ໜ້າຫຼັກ / ການເຄື່ອນໄຫວ / ອົງການ ເຈວີຊີ ປູກຕົ້ນໄມ້ ແລະປ່ອຍປາ ເຂດວັງສະຫງວນຫ້ວຍຍືດ
ວັນທີ 17 ມິຖຸນາ ນີ້, ອົງການອາສາສະໝັກຍີ່ປຸ່ນ ເຈວີຊີ (JVC), ຊຶ່ງນໍາໂດຍ ທ່ານ ຫຸມພັນ ແສງຈັນທອງ ຜູ້ປະສານງານອົງການ ເຈວີຊີ, ມີທ່ານ ສະໜອງ ສິມມາວັດ ຫົວຫນ້າຫ້ອງການກະສິກຳ ແລະປ່າໄມ້ເມືອງລະມາມ, ມີອາສາສະໝັກຍີ່ປຸ່ນ ພ້ອມດ້ວຍອຳນາດການປົກຄອງບ້ານ, ຫນ່ວຍງານລາດຕະເວນ ແລະປະຊາຊົນເຂົ້າຮ່ວມ.
ທ່ານ ຫຸມພັນ ແສງຈັນທອງ ໃຫ້ຮູ້ວ່າ: ໃນໄລຍະຜ່ານມາ ອົງການ ເຈວີຊີ ໄດ້ສະຫນັບສະຫນູນທຶນຮອນຈໍານວນຫນຶ່ງ ເຂົ້າໃນໂຄງການອະນຸລັກຊັບພະຍາກອນທໍາມະຊາດ ແລະເປັນມິດກັບສິ່ງແວດລ້ອມ ໃນການປະຕິບັດກິດຈະກຳຕ່າງໆ ເປັນຕົ້ນກ່ຽວກັບການຟື້ນຟູຊີວະນາໆພັນ, ເພື່ອສ້າງຄວາມເຂັ້ມແຂງໃຫ້ແກ່ຊາວບ້ານເປົ້າໝາຍ ໃນການຄຸ້ມຄອງຊັບພະຍາກອນທໍາມະຊາດເພື່ອໃຫ້ມີຄວາມຍືນຍົງ ແລະ ການປູກຈິດສໍານຶກໃນການຄຸ້ມຄອງຊັບພະຍາກອນທໍາມະຊາດຂອງຊຸມຊົນ; ຊຶ່ງເບ້ຍໄມ້ທີ່ນໍາປູກໃນມື້ນີ້ປະກອບມີ: ໄມ້ແຄນ ແລະໄມ້ຂາມ 150 ເບ້ຍ, ຊຶ່ງໄດ້ປູກຢູ່ຂອບເຂດວັງສະຫງວນຫ້ວຍຍືດ ແລະມີປາກິນຫຍ້າ ແລະປາໄນ 1 ພັນກວ່າໂຕ, ທີ່ນໍາໄປປ່ອຍຄືນສູ່ທໍາມະຊາດວັງສະຫງວນດັ່ງກ່າວ, ນອກນີ້ ຍັງມີຫມາກຖົ່ວດິນ 10 ກວ່າກິໂລ ເພື່ອໃຫ້ປະຊາຊົນທົດລອງປູກສັບຫວ່າງສວນມັນຕົ້ນ ເພື່ອເປັນການປັບປຸງດິນ. ທັງນີ້ ເພື່ອເປັນການສ້າງຂະບວນການເນື່ອງໃນວັນປູກຕົ້ນໄມ້ແຫ່ງຊາດ 1 ມິຖຸນາ ແລະວັນປ່ອຍປາແຫ່ງຊາດ 13 ກໍລະກົດ ເພື່ອເປັນການຟື້ນຟູຊີວະນາໆພັນ ໃຫ້ມີຄວາມອຸດົມສົມບູນຂຶ້ນຕື່ມ ແລະເພື່ອປ່ອຍປາຄືນສູ່ທໍາມະຊາດຕື່ມອີກ.
ໂອກາດນີ້ ທ່ານ ສະໜອງ ສິມມາວັດ ກໍໄດ້ສະແດງຄວາມຂອບໃຈມາຍັງອົງການ ເຈວີຊີ ທີ່ສະຫນັບສະຫນູນທຶນຮອນເຂົາໃສ່ກິດຈະກຳດັ່ງກ່າວ ແລະຮຽກຮ້ອງມາຍັງອໍານາດການປົກຄອງບ້ານ ແລະປະຊາຊົນ ເປັນເຈົ້າການເອົາໃຈໃສ່ຮ່ວມກັນໃນການເບິ່ງແຍງດູແລ, ຮັກສາຕົ້ນໄມ້ທີ່ປູກແລ້ວ ຕ້ອງມີການບົວລະບັດຮັກສາໃຫ້ຍືນຍົງ, ພ້ອມທັງໃຫ້ມີການປະຕິບັດວິໄນຕໍ່ຜູ້ລະເມີດ-ບຸກລຸກປ່າ ຕາມລະບຽບກົດໝາຍຢ່າງເຂັ້ມງວດ.
