ໜ້າຫຼັກ / ການເຄື່ອນໄຫວ / ເປີດຊຸດຮຽນທິດສະດີການເມືອງຂັ້ນກາງ ຮຸ່ນທີ III
ພິທີເປີດຊຸດຮຽນທິດສະດີການເມືອງຂັ້ນກາງ ຮຸ່ນທີ III, ໄດ້ຈັດຂຶ້ນໃນວັນທີ 9 ສິງຫາ 2024 ນີ້ ທີ່ໂຮງຮຽນການເມືອງ ແລະການປົກຄອງແຂວງເຊກອງ, ໂດຍການເປັນປະທານຮ່ວມ ຂອງທ່ານ ນາງ ຄໍາຫຼ້າ ແກ້ວອຸ່ນຄໍາ ຄະນະບໍລິຫານງານພັກ, ຮອງຫົວໜ້າສະຖາບັນການເມືອງ ແລະການປົກຄອງ ແລະ ທ່ານ ນາງ ສີສະຫງ່າ ແກ້ວດວງດີ ກຳມະການປະຈໍາພັກພັກແຂວງ, ຫົວໜ້າຄະນະໂຄສະນາອົບຮົມແຂວງເຊກອງ, ມີຄູອາຈານ ແລະນັກສຶກສາ ພ້ອມດ້ວຍຂະແຫນງການກ່ຽວຂ້ອງເຂົ້າຮ່ວມ.
ໃນພິທີ ທ່ານ ຄໍາເຂືອງ ໄຊຍະເສນ ຮອງ- ຜູ້ປະຈໍາການຫົວໜ້າໂຮງຮຽນການເມືອງ ແລະການປົກຄອງແຂວງ ລາຍງານຄວາມພ້ອມ ແລະແຜນການຈັດຕັ້ງປະຕິບັດຫຼັກສູດການຮຽນ-ການສອນທິດສະດີການເມືອງ ຂັ້ນກາງ ຮຸ່ນທີ III ວ່າ: ບຸກຄະລາກອນທີ່ຈະເຂົ້າຮຽນທິດສະດີການເມືອງ ຂັ້ນກາງ ຮຸ່ນທີ III ມີຈຳນວນ 49 ທ່ານ, ຍິງ 11 ທ່ານ, ມາຈາກພະແນກການ-ອົງການທຽບເທົ່າອ້ອມຂ້າງແຂວງ 29 ທ່ານ, ຍິງ 7 ທ່ານ, ຈາກຫ້ອງການ 4 ເມືອງ 20 ທ່ານ, ຍິງ 4 ທ່ານ, ມີຄູ-ອາຈານ 28 ທ່ານ, ຍິງ 9 ທ່ານ. ໃນນັ້ນ ຄູ-ອາຈານຮັບເຊີນ ມີ 11 ທ່ານ, ຍິງ 3 ທ່ານ ມາຈາກພະແນກການອ້ອມຂ້າງແຂວງ, ຄູ-ອາຈານພາຍໃນ ຮມປຂ 17 ທ່ານ, ຍິງ 6 ທ່ານ, ໂດຍການນໍາໃຊ້ເວລາເຂົ້າໃນການປະຕິບັດຫຼັກສູດການຮຽນ-ການສອນ ທັງໝົດ 6 ເດືອນ. ປະກອບມີ VII ກຸ່ມວິຊາ 83 ບົດ 721 ຊົ່ວໂມງຄື: ກຸ່ມວິຊາ ປັດຊະຍາມາກ-ເລນິນ ແລະ ວັດທະນະທຳ ມີ 2 ວິຊາ 11 ບົດ, ກຸ່ມວິຊາ ເສດຖະສາດການເມືອງມາກ-ເລນິນ ແລະ ຄຸ້ມຄອງເສດຖະກິດ. ມີ 2 ວິຊາ 16 ບົດ, ກຸ່ມວິຊາ ລັດທິສັງຄົມນິຍົມວິທະຍາ, ພົວພັນສາກົນ, ສັງຄົມສາດ, ປ້ອງກັນຊາດ-ປ້ອງກັນຄວາມສະຫງົບ. ມີ 4 ວິຊາ 24 ບົດ, ກຸ່ມວິຊາ ແນວຄິດ ໄກສອນ ພົມວິຫານ (ການເມືອງ, ເສດຖະກິດ, ສັງຄົມ ແລະ ວັດທະນະທຳ). ມີ 8 ບົດ, ກຸ່ມວິຊາ ພື້ນຖານການຄຸ້ມຄອງບໍລິຫານລັດ, ທິດສະດີລັດ ແລະ ກົດໝາຍ ແລະ ເຕັກ ນິກບໍລິຫານ. ມີ 3 ວິຊາ 11 ບົດ, ກຸ່ມວິຊາ ປະຫວັດ ສາດພັກ ແລະ ກໍ່ສ້າງພັກ. ມີ 2 ວິຊາ 13 ບົດ, ກຸ່ມວິຊາ ບັງຄັບ, ຫົວຂໍ້ລາຍງານເພີ່ມ ແລະ ຍັງມີການຂຽນບົດຈົບຂັ້ນຕາມາດຕະ ຖານກໍານົດໄວ້.
ໂອກາດນີ້, ທ່ານ ນາງ ຄໍາຫຼ້າ ແກ້ວອຸ່ນຄໍາ ແລະ ທ່ານ ນາງ ສີສະຫງ່າ ແກ້ວດວງດີ ໄດ້ຜັດປ່ຽນກັນໂອ້ລົມໃຫ້ທິດຊີ້ນໍາຫລາຍບັນຫາ ຊຶ່ງເນັ້ນໃຫ້ນັກສຶກສາທຸກຄົນມີຄວາມຮູ້ທາງດ້ານທິດສະດີການເມືອງ, ການປົກຄອງ, ກໍາແຫນ້ນລັດທິມາກ-ເລນິນ, ແນວຄິດໄກສອນ ພົມວິຫານ, ຫມູນໃຊ້ຢ່າງປະດິດສ້າງ, ສະດຸ້ງໄວກໍາໄດ້ກາລະໂອກາດ ຜ່ານຜ່າຄວາມຫຍຸ້ງຍາກ ແລະສິ່ງທ້າທາຍຕ່າງໆ, ຕ້ອງຝຶກຝົນຫຼໍ່ຫຼອມຄຸນທາດການເມືອງ, ຄຸນສົມບັດສິນທໍາປະຕິວັດ, ຫຼັງຈາກຈົບຫຼັກສູດບຳລຸງທິດສະດີການເມືອງນີ້ແລ້ວ ຕ້ອງຮັບປະກັນໃຫ້ໄດ້ 3 ເປັນ ແລະ 7 ຮູ້ຄື: ເປັນຄົນດີ, ເປັນຄົນເກັ່ງ, ເປັນຜູ້ຫ້າວຫັນປະຕິວັດ; ຮູ້ເຮັດວຽກ, ຮູ້ເສຍສະຫຼະ, ຮູ້ອັນຖືກ-ອັນຜິດ, ຮູ້ວາງແຜນ, ຮູ້ຈັດຕັ້ງປະຕິບັດແຜນຂອງກົມກອງທ້ອງຖິ່ນຕົນ, ຮູ້ການເຮັດວຽກ ທີ່ຖືກຫຼັກການ, ມີວິທະຍາສາດ, ປະດິດສ້າງ ແລະ ຮູ້ດໍາລົງຊີວິດທີ່ເປັນແບບຢ່າງ, ເປັນຕົວແບບໃຫ້ມະຫາຊົນຮັກແພງ, ນັບຖື ແລະ ໃຫ້ມະຫາຊົນເດີນຕາມ; ສໍາລັບຄູ-ອາຈານ ຕ້ອງໄດ້ຝຶກຝົນຫຼໍ່ຫຼອມຮອບດ້ານ, ເອົາໃຈໃສ່ຍົກລະດັບຄວາມຮູ້, ຄວາມສາມາດ, ຂໍ້ມູນວິທະຍາສາດ, ຄົ້ນຄວ້າຊອກເຫັນບັນຫາໃຫມ່ໆ ໃຫ້ມີລັກສະນະຮອບດ້ານ ນັບທັງຈາກພຶດຕິກໍາຕົວຈິງ, ຈາກການຄົ້ນຄວ້າວິທະຍາສາດ, ເພື່ອມາຖ່າຍທອດໃຫ້ຜູ້ຮຽນ ສາມາດຮັບເອົາບັນຫາໃຫມ່ໄດ້.
