ໜ້າຫຼັກ / ການເຄື່ອນໄຫວ / ຊີໂລ ເວດ ລາວ ຈັດກິດຈະກຳ ໄວໜຸ່ມເພື່ອຫຼຸດຜ່ອນການປ່ຽນແປງດິນຟ້າອາກາດ ຢູ່ແຂວງເຊກອງ
ວັນທີ 20 ກັນຍາ 2024 ຜ່ານມາ ສະມາຄົມ ຊີໂລ ເວດ ລາວ (Zero Waste Laos) ຮ່ວມກັບພະແນກສຶກສາທິການ ແລະກິລາແຂວງເຊກອງ ຈັດກິດຈະກໍາ ໄວໜຸ່ມເພື່ອຫຼຸດຜ່ອນການປ່ຽນແປງດິນຟ້າອາກາດ ທີ່ສະໂມສອນແຂວງເຊກອງ, ໂດຍການເຂົ້າຮ່ວມຂອງທ່ານ ວັນເພັງ ທອງສີ ຮອງຫົວໜ້າພະແນກ ສຶກສາທິການ ແລະກິລາແຂວງ, ມີທ່ານ ນາງ ສຸກສະເຫວີຍ ແກ້ວທຽມຈັນ ປະທານສະມາຄົມ ຊີໂລ ເວດ ລາວ, ພ້ອມດ້ວຍອາສາສະໝັກ, ຂະແໜງການກ່ຽວຂ້ອງ, ພະນັກງານຄູອາຈານ ແລະນ້ອງໆນັກຮຽນ 30 ແຫ່ງໃນເມືອງລະມາມເຂົ້້າຮ່ວມ.
ໃນວາລະຈັດກິດຈະກໍາດັ່ງກ່າວ, ທ່ານ ນາງ ວັນເພັງ ທອງສີ ກ່າວຂອບໃຈມາຍັງ ສະມາຄົມ ຊີໂລ ເວດ ລາວ ທີ່ເຫັນຄວາມສໍາຄັນໃນການປົກປັກຮັກສາສິ່ງແວດລ້ອມ, ການສ້າງພື້ນທີ່ສີຂຽວ, ສ້າງໂຮງຮຽນຕົວແບບ ທີ່ຈະເປັນສູນໃນການກ້າເບ້ຍໄມ້-ໂຮງຮຽນສີຂຽວ ທັງເປັນການປູກຈິດສໍານຶກ ແລະດຶງເອົາໄວໜຸ່ມເຂົ້າມາມີສ່ວນຮ່ວມໃນກິດຈະກໍາດັ່ງກ່າວ ເຊິ່ງສອດຄ່ອງກັບສາມຫຼັກມູນການສຶກສາ ແລະສ້າງຊາວໜຸ່ມ ໄວໜຸ່ມ ໃຫ້ຫ່າງໄກຢາເສບຕິດຕື່ມອີກ.
ທ່ານ ນາງ ສຸກສະເຫວີຍ ແກ້ວທຽມຈັນ ປະທານສະມາຄົມ ຊີໂລ ເວດ ລາວ (Zero Waste Laos) ໄດ້ກ່າວວ່າ ການຮັກສາສີ່ງແວດລ້ອມໃຫ້ເກີດຄວາມຍືນຍົງ ແມ່ນມີຄວາມຈຳເປັນຫລາຍ ທີ່ໄວຫນຸ່ມຕ້ອງໄດ້ມີສ່ວນຮ່ວມໃນການປົກປັກຮັກສາ ແລະຟື້ນຟູ ເພື່ອຈະໄດ້ໃຫ້ພວກເຮົາມີຊັບພະຍາກອນທີ່ອຸດົມສົມບູນຈົນຮອດລຸ້ນລູກລຸ້ນຫລານ ແລະ
ການຈັດກິດຈະກຳ ໄວຫນຸ່ມເພື່ອຫລຸດຜ່ອນການປ່ຽນແປງດິນຟ້າອາກາດ ໃນມື້ນີ້ ກໍແມ່ນເພື່ອປູກຈິດສຳນຶກ ເຜີຍແຜ່ຄວາມຮູ້ໃນການປະກອບສ່ວນ ແລະ ຫັນເປັນໂຮງຮຽນສີຂຽວ ໂດຍເນັ້ນໃສ່ການປູກຕົ້ນໄມ້ ແລະ ຮັກສາຄວາມສະອາດໃນສະຖານທີ່ສຶກສາ.
ຈາກນັ້ນ ບັນດາອາສາສະໝັກ ຈາກສະມາຄົມ ຊີໂລ ເວດ ລາວ ໄດ້ຜັນປ່ຽນກັນນໍາສະເໜີ ແລະເປີດເວທີສົນທະນາ ກ່ຽວກັບບັນຫາການປ່ຽນແປງດິນຟ້າອາກາດ ແລະວິທີແກ້ໄຂ, ນໍາສະເໜີກ່ຽວກັບໂຮງຮຽນສີຂຽວ ຫຼື ໂຮງຮຽນຕົວແບບໃນການຮັກສາສິ່ງແວດລ້ອມ, ນອກຈາກນັ້ນ ໄດ້ຮ່ວມກັບຄູອາຈານ ແລະນ້ອງໆນັກຮຽນ ຈັດກິດຈະກໍາ ເຊັ່ນ: ຫຼິ້ນເກມຈິກຊໍຮັກໂລກ, ເກມກະສິກໍາ, ເກມການຂົນສົ່ງ, ເກມປະຢັດພະລັງງານ ແລະເກມຄໍາໃບ້ໄພພິບັດ ເພື່ອລະດົມຄໍາຄິດຄໍາເຫັນໃນຫົວຂໍ້ “ການທີ່ຈະກ້າວໄປເປັນໂຮງຮຽນຕົວແບບໃນການຮັກສາສິ່ງແວດລ້ອມ Eco School champion”. ພ້ອມນີ້ ຈາກສະມາຄົມ ຊີໂລ ເວດ ລາວ ຍັງໄດ້ມອບເບ້ຍໄມ້ ຈໍານວນ 500 ເບ້ຍ ໃຫ້ພະແນກສຶກສາ ໄປມອບຕໍ່ໃຫ້ 30 ໂຮງຮຽນທີ່ເຂົ້າຮ່ວມ ເພື່ອນໍາໄປປູກໃນສະຖານທີ່ສຶກສາຕື່ມອີກ.
