ໜ້າຫຼັກ / ການເຄື່ອນໄຫວ / ເຊກອງ-ກອນຕູມ ສະຫລຸບການຮ່ວມມືການສະກັດກັ້ນການລະເມີດຊັບພະຍາກອນປ່າໄມ້ ຢູ່ເຂດຊາຍແດນ
ກອງປະຊຸມ ສະຫລຸບວຽກງານການຈັດຕັ້ງປະຕິບັດບົດບັນທຶກຊ່ວຍຈໍາ ກົນໄກການຮ່ວມມືເພື່ອສະກັດກັ້ນການລະເມີດຊັບພະຍາກອນປ່າໄມ້, ສັດປ່າ ແລະການຄຸ້ມຄອງເຄື່ອງປ່າຂອງດົງ ຢູ່ລຽບຕາມຊາຍແດນ ລາວ-ຫວຽດນາມ ໃນໄລຍະຜ່ານມາ, ລະຫວ່າງ ພະແນກກະສິກຳ ແລະປ່າໄມ້ແຂວງເຊກອງ ແລະ ພະແນກກະສິກຳ ແລະພັດທະນາຊົນນະບົດ ແຂວງກອນຕູມ, ຝ່າຍ ສປປ ລາວ ນໍາໂດຍທ່ານ ເສີມສີ ສຸລິຕະ ຫົວຫນ້າພະແນກກະສິກຳ ແລະປ່າໄມ້ແຂວງເຊກອງ, ຝ່າຍ ສສ ຫວຽດນາມ ນໍາໂດຍທ່ານ ຫງວຽນເຕີນລຽມ ກຳມະການພັກແຂວງ, ຫົວຫນ້າພະແນກກະສິກຳ ແລະພັດທະນາຊົນນະບົດ ແຂວງກອນຕູມ, ພ້ອມດ້ວຍຂະແຫນງການກ່ຽວຂ້ອງ ທັງສອງແຂວງເຂົ້າຮ່ວມ.
ໃນວາລະກອງປະຊຸມ, ກອງກວດກາປ່າໄມ້ທັງສອງແຂວງ ໄດ້ລາຍງານການຈັດຕັ້ງປະຕິບັດວຽກງານກວດກາ, ເຜີຍແຜ່ນິຕິກຳ ແລະກົດຫມາຍຕາມບ້ານລຽບຕາມຊາຍແດນລາວ-ຫວຽດນາມ ຄື ເມືອງດາກຈຶງ ແຂວງເຊກອງ ແລະເມືອງດາໄລ ແຂວງກອນຕູມ ຕາມບົດບັນທຶກຊ່ວຍຈໍາ ລະຫວ່າງກອງກວດກາປ່າໄມ້ ແຂວງເຊກອງ ແລະກອງກວດກາປ່າໄມ້ແຂວງກອນຕອມ ຄັ້ງວັນທີ 20 ກັນຍາ ປີ 2022 ຜ່ານມາ.
ທ່ານ ນາງ ນຸພາພອນ ໄມນີທອງ ຫົວຫນ້າກອງກວດກາປ່າໄມ້ ພະແນກກະສິກຳ ແລະປ່າໄມ້ແຂວງເຊກອງ ໃຫ້ຮູ້ວ່າ: ໃນໄລຍະຜ່ານມາ ພວກເຮົາໄດ້ສົມທົບກັບພາກສ່ວນທີ່ກ່ຽວຂ້ອງ ແລະ ກອງຮ້ອຍທະຫານຊາຍແດນ 532 ລົງເຄື່ອນໄຫວກວດກາລາດຕະເວນ, ເຜີຍແຜ່ເຊື່ອມຊຶມ, ປູກຈິດສໍານຶກໃຫ້ພໍ່ແມ່ປະຊາຊົນບັນດາເຜົ່າ ບ້ານເປົ້າໝາຍລຽບຕາມຊາຍແດນລາວ-ຫວຽດນາມໃຫ້ມີຄວາມຮັບຮູ້, ເຂົ້າໃຈຕໍ່ລະບຽບກົດໝາຍໃນການ ຄຸ້ມຄອງປົກປັກຮັກສາຊັບພະຍາກອນປ່າໄມ້ ໃຫ້ຍືນຍົງ ແລະຍາວນານ; ໄດ້ລົງເຄື່ອນໄຫວກວດກາພົບເຫັນ ພໍ່ແມ່ປະຊາຊົນບ້ານບຼອງນ້ອຍ (ກຸ່ມດາກປຣາ) ເຂົ້າໄປກີດຢາງແປກໃນຂອບເຂດບ້ານຂອງຕົນ ແລະໄດ້ສຶກສາອົບຮົມ ໃຫ້ຢຸດເຊົາ; ໄດ້ລົງເຄື່ອນໄຫວເຜີຍແຜ່ກົດໝາຍ ແລະ ນິຕິກຳຕ່າງໆ ທີ່ພົວພັນເຖິງພໍ່ແມ່ປະຊາຊົນບັນດາເຜົ່າເພື່ອໃຫ້ຮັບຮູ້ ແລະ ເຂົ້າໃຈຢ່າງເລິກເຊີງຕໍ່ແນວທາງຂອງພັກລັດວາງອອກ.
ຈາກນັ້ນ ທັງສອງຝ່າຍໄດ້ລົງນາມ ບົດບັນທຶກຊ່ວຍຈໍາ ກ່ຽວກັບກົນໄກຮ່ວມມືສະກັດກັ້ນສະພາບການຝ່າຝືນໃນຂົງເຂດປ່າໄມ້ ແລະວາງທິດທາງການປະສານສົມທົບໃນປີ 2025, ຊຶ່ງເຫັນດີສືບຕໍ່ຈັດຕັ້ງປະຕິບັດບັນດາເນື້ອໃນຂອງບົດບັນທຶກຊ່ວຍຈຳທີ່ໄດ້ລົງນາມ, ເພີ່ມທະວີການຮ່ວມມື ແລະ ແລກປ່ຽນຂໍ້ມູນຂ່າວສານ ເພື່ອຄວບຄຸມ ແລະ ສະກັດກັ້ນ ການລັກລອບຂຸດຄົ້ນ, ຊື້-ຂາຍ ແລະ ຂົນສົ່ງເຄື່ອງປ່າຂອງດົງ (ໄມ້, ເຄື່ອງປ່າຂອງດົງ, ສັດປ່າ...) ທີ່ຜິດກົດໝາຍຢູ່ເຂດລຽບຊາຍແດນລະຫວ່າງແຂວງກອນຕູມ ແລະ ແຂວງເຊກອງ, ຊີ້ນໍາໜ່ວຍງານກວດກາປ່າໄມ້ເມືອງດັກໄລ ແຂວງກອນຕູມ ແລະ ໜ່ວຍງານກວດ ກາປ່າໄມ້ເມືອງດາກຈຶງ ແຂວງເຊກອງ ເປັນເຈົ້າການໃນການແລກປ່ຽນຂໍ້ມູນຂ່າວສານ ແລະ ສົມທົບກັນແກ້ໄຂບັນຫາທີ່ກ່ຽວຂ້ອງເຖິງວຽກງານປົກປັກຮັກສາປ່າ, ສະກັດກັ້ນ ແລະ ຄຸ້ມຄອງເຄື່ອງປ່າຂອງດົງຢູ່ເຂດຊາຍແດນ.
