ໜ້າຫຼັກ / ການເຄື່ອນໄຫວ / ຖວທ ເຊກອງ ປະເມີນໜ່ວຍພັກ ປອດໃສ ເຂັ້ມແຂງ ໜັກແໜ້ນ ປະຈໍາປີ 2024
ໜ່ວຍພັກຖະແຫລງຂ່າວ-ສື່ມວນຊົນ ທີ່ຂຶ້ນກັບຄະນະພັກຮາກຖານ ພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງເຊກອງ ໄດ້ດຳເນີນກອງປະຊຸມກວດກາ, ປະເມີນໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ 2024 ແລະ ວາງທິດທາງແຜນການ ປີ 2025 ໃນວັນທີ 23 ຕຸລາ 2024 ຜ່ານມາ, ໂດຍການເປັນປະທານຂອງສະຫາຍ ວິໄລ ອາດພູທອນ ຮອງເລຂາໜ່ວຍພັກຖະແຫລງຂ່າວ-ສື່ມວນຊົນ, ໃຫ້ກຽດເຂົ້າຮ່ວມມີສະຫາຍ ບຸນທົງ ຖິ່ນດອນໂຂງ ປະທານກວດກາຄະນະພັກຮາກຖານ ພະແນກ ຖວທ ແຂວງ, ບັນດາຄະນະໜ່ວຍພັກ, ຕາງໜ້າອົງການຈັດຕັ້ງມະຫາຊົນ ພ້ອມດ້ວຍສະມາຊິກພັກ ເຂົ້າຮ່ວມ.
ສະຫາຍ ວິໄລ ອາດພູທອນ ໄດ້ຊີ້ໃຫ້ເຫັນການຈັດຕັ້ງປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ. ເຊິ່ງໜ່ວຍພັກຖະແຫຼງຂ່າວສື່ມວນຊົນ ແມ່ນອົງກອນໜຶ່ງຂອງການຈັດຕັ້ງພັກ-ລັດ ມີພາລະບົດບາດໃນການນໍາພາ-ຊີ້ນໍາສະມາຊິກພັກ, ພະນັກງານ-ລັດຖະກອນຄົ້ນຄວ້າເຊື່ອມຊຶມມະຕິ, ຄໍາສັ່ງ, ກົດລະບຽບຂອງພັກ ແລະ ກົດໝາຍຂອງລັດ; ເປັນເສນາທິການໃຫ້ແກ່ຄະນະພັກ-ຄະນະພະແນກ ຖວທ ແຂວງຄຸ້ມຄອງ ແລະ ພັດທະນາວຽກງານຖະແຫລງຂ່າວ-ສື່ມວນຊົນ, ເຮັດໜ້າທີ່ເປັນກະບອກສຽງອັນຄົມແຫລມຄົມ, ວ່ອງໄວ, ທັນການໃນການເຜີຍແຜ່ແນວທາງຂອງພັກ, ແຜນນະໂຍບາຍ, ກົດໝາຍ, ລະບຽບການຕ່າງໆ ແລະ ແຜນພັດທະນາເສດຖະກິດ-ສັງຄົມຂອງລັດ ໃຫ້ປະຊາຊົນຮັບຮູ້-ເຂົ້າໃຈຢ່າງກວ້າງຂວາງ ແລະ ທົ່ວເຖິງ, ປະກອບສ່ວນເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ. ຊຶ່ງພາຍໃນໜ່ວຍພັກມີຄະນະໜ່ວຍພັກ 3 ສະຫາຍ, ຍິງ 1 ສະຫາຍ, ມີສະມາຊິກພັກທັງໝົດ 19 ສະຫາຍ, ຍິງ 7 ສະຫາຍ. ໃນນີ້, ມີສະມາຊິກແຂງ 19 ສະຫາຍ, ຍິງ 7 ສະຫາຍ.
ພ້ອມນີ້, ບັນດາສະຫາຍສະມາຊິກພັກພາຍໃນໜ່ວຍກໍ່ໄດ້ປະກອບຄຳຄິດຄຳເຫັນໃສ່ບົດປະເມີນ ແລະ ທິດທາງ ແຜນການຢ່າງສ້າງສັນ ດ້ວຍຄວາມຮັບຜິດຊອບສູງ ເພື່ອເຮັດໃຫ້ບົດປະເມີນຜົນ ແລະ ທິດທາງແຜນການສ້າງໜ່ວຍພັກປອດໃສ ເຂັ້ມແຂງ ແລະ ໜັກແໜ້ນ ຂອງໜ່ວຍພັກຖະແຫລງຂ່າວ-ສື່ມວນຊົນກາຍເປັນຮ່າງທີ່ສົມບູນສາມາດນຳໄປຈັດຕັ້ງປະຕິບັດ ແລະ ເປັນບ່ອນອີງໃນການນຳພາ-ຊີ້ນຳຢ່າງສອດຄ່ອງ.
ໃນກອງປະຊຸມ, ບັນດາສະຫາຍສະມາຊິກພັກໄດ້ພ້ອມກັນລົງປະຊາມະຕິຕີລາຄາຄຸນນະພາບ ແລະ ການແບ່ງປະເພດໜ່ວຍພັກ ຕາມ 5 ເນື້ອໃນແມ່ນບັນລຸຕາມລະດັບຄາດໝາຍ ເຊັ່ນ: ດ້ານການເມືອງບັນລຸ 1,9 ຄະແນນ, ດ້ານແນວຄິດ 1,5 ຄະແນນ, ດ້ານການຈັດຕັ້ງ 1,4 ຄະແນນ, ດ້ານແບບແຜນການນໍາພາ 1,8 ຄະແນນ ແລະ ດ້ານການປະຕິບັດຕໍ່ໜ້າທີ່ການເມືອງ 2,9 ຄະແນນ, ຄະແນນລວມ 9,5 ຄະແນນ. ໜ່ວຍພັກໄດ້ຈັດໃນປະເພດແຂງ.
