ພິທີມອບ-ຮັບ ຜົນສໍາເລັດການຈັດຕັ້ງປະຕິບັດໂຄງການຊົນຝົນຝອຍ (ໄລຍະ III) ລະຫວ່າງ ບໍລິສັດ ບາວເອີ ປະເທດໂອຕຣິດ (ຜູ້ດໍາເນີນໂຄງການ) ແລະ ກົມຊົນລະປະທານ ກະຊວງກະສິກໍາ ແລະ ປ່າໄມ້ (ເຈົ້າຂອງໂຄງການ) ເພື່ອມອບຕໍ່ໃຫ້ພະແນກກະສິກໍາ ແລະ ປ່າໄມ້ແຂວງ ກໍຄືຫ້ອງການກະສິກໍາ ແລະ ປ່າໄມ້ເມືອງທ່າແຕງ ແຂວງເຊກອງ ແລະ ເມືອງປາກຊ່ອງ ແຂວງຈໍາປາສັກ ເປັນຜູ້ຄຸ້ມຄອງ ແລະ ນໍາໃຊ້ສົ່ງເສີມການຜະລິດກະສິກໍາ ຈັດຂຶ້ນໃນວັນທີ 12 ພະຈິກ 2024 ທີ່ໂຮງແຮມຈໍາປາສັກແກຣນ ນະຄອນປາກເຊ ແຂວງຈໍາປາສັກ ໂດຍມີທ່ານ ລິນຄໍາ ດວງສະຫວັນ ລັດຖະມົນຕີກະຊວງກະສິກຳ ແລະ ປ່າໄມ້, ທ່ານ ຂັນຕີ ສີລະວົງສາ ຮອງເຈົ້າແຂວງເຊກອງ, ທ່ານ ສົມບູນ ເຮືອງວົງສາ ຮອງເຈົ້າແຂວງຈໍາປາສັກ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ທ່ານ ສີສະຫວາດ ອິນທະໄຊ ຜູ້ປະສານງານໂຄງການ, ຕາງໜ້າບໍລິສັດ ບາວເອີ ປະເທດໂອຕຣິດ ໄດ້ໃຫ້ຮູ້ວ່າ: ກົມຊົນລະປະທານ ກະຊວງກະສິກໍາ ແລະ ປ່າໄມ້ ຮ່ວມມືກັບບໍລິສັດ ບາວເອີ ປະເທດໂອຕຣິດ ທີ່ເປັນຄູ່ຮ່ວມສັນຍາໃນການຕອບສະໜອງດ້ານອຸປະກອນສະປິງເກີ (ຝົນຝອຍ) ໃຫ້ແກ່ ສປປ ລາວ ໄດ້ເລີ່ມການສຶກສາຄວາມເປັນໄປໄດ້ ຂອງໂຄງການຝົນຝອຍ ໄລຍະທີ III ຢູ່ເຂດພູພຽງບໍລິເວນ. ມາຮອດປີ 2020 ກໍ່ໄດ້ຮັບການເຊັນອະນຸມັດການຈັດຕັ້ງປະຕິບັດ ລະຫວ່າງ ກົມຊົນລະປະທານ ກັບບໍລິສັດ ບາວເອີ ເພື່ອພັດທະນາ ແລະ ຈັດຫານໍ້າໃຕ້ດິນ ມານໍາໃຊ້ເຂົ້າໃນການຕອບສະໜອງໃຫ້ແກ່ການປູກພືດຜັກ ດ້ວຍການນໍາໃຊ້ລະບົບສະປິງເກີ (ແບບສີດພົ່ນ). ໂຄງການຝົນຝອຍ ໄລຍະ III ມີທີ່ຕັ້ງເລີ່ມຈາກເທສະບານເມືອງທ່າແຕງ ແຂວງເຊກອງ ຫາເມືອງປາກຊ່ອງ ແຂວງຈໍາປາສັກ ໃນເນື້ອທີ່ທັງໝົດ 166 ເຮັກຕາ. ໃນນີ້, ຢູ່ບ້ານຫລັກຂາວ ເມືອງທ່າແຕງ ຈໍານວນ 124 ເຮັກຕາ ແລະ ຢູ່ເມືອງປາກຊ່ອງ ຈໍານວນ 42 ເຮັກຕາ ຄື: ບ້ານລີເຈືອງ 8 ເຮັກຕາ, ສູນບໍລິການເຕັກນິກກະສິກໍາ (ໜອງຫີນ) 10 ເຮັກຕາ ແລະ ຈຸດທົດລອງປູກພືດອຸດສາຫະກໍາ (ບໍລິສັດ AIDC) ບ້ານກົງຕູນ 24 ເຮັກຕາ.

ໂຄງການດັ່ງກ່າວ, ໄດ້ເລີ່ມຈັດຕັ້ງປະຕິບັດມາແຕ່ເດືອນມີນາ 2023 ສະໜອງອຸປະກອນການຜະລິດ (ລົດແທັກເຕີຈໍານວນ 15 ຄັນ); ຕິດຕັ້ງໝໍ້ແປງໄຟຟ້າ ຂະໜາດ 50 Kva; ກໍ່ສ້າງ ແລະ ຕິດຕັ້ງລະບົບຕາຂ່າຍໄຟຟ້າແຮງກາງ 22 Kv; ຂຸດເຈາະບໍ່ບາດານ-ຕິດຕັ້ງເຄື່ອງສູບນໍ້າບາດານ; ຕິດຕັ້ງລະບົບສະປິງເກີ, ຈັກສູບນໍ້າ ແລະ ອຸປະກອນສີດພົ່ນ ສໍາລັບເນື້ອທີ່ 2 ເຮັກຕາ, ເນື້ອທີ່ 4 ເຮັດຕາ ແລະ ເນື້ອທີ່ 8 ເຮັກຕາ. ພ້ອມທັງ ຈັດຕັ້ງກຸ່ມ, ສ້າງລະບຽບການຄຸ້ມຄອງ-ນໍາໃຊ້ນໍ້າ ແລະ ລົດແທັກເຕີ ແລະ ຝຶກອົບຮົມການນໍາໃຊ້ໃຫ້ແກ່ຜູ້ໄດ້ຮັບຜົນປະໂຫຍດ ລວມມູນຄ່າທັງໝົດ ໃນມູນຄ່າ 3,6 ລ້ານເອີໂຣ ຫລືເທົ່າກັບ 83,9 ຕື້ກວ່າກີບ.