ໜ້າຫຼັກ / ການເຄື່ອນໄຫວ / ແຂວງດັກລັກ ມອບອຸປະກອນຮັບໃຊ້ ໃຫ້ພະແນກ ຖວທ ແຂວງເຊກອງ
ເພື່ອເປັນການສືບຕໍ່ຜັນຂະຫຍາຍສາຍພົວພັນຮ່ວມມືແບບພິເສດ ແລະເປັນການປະຕິບັດແນວທາງການຕ່າງປະເທດ ຂອງສອງພັກ-ສອງລັດ, ທັງເປັນການສືບຕໍ່ປະຕິບັດບົດບັນທຶກຊ່ວຍຈໍາ ທີ່ການນໍາທັງສອງແຂວງ ເຊກອງ-ດັກລັກ ໃຫ້ປະກົດຜົນເປັນຈິງ
ວັນທີ 4 ທັນວາ 2024 ນີ້, ທີ່ພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວແຂວງເຊກອງ, ທ່ານ ຫຼ້າຍ ດຶກ ດ້າຍ ຮອງຫົວໜ້າພະແນກວັດທະນະທໍາ, ກິລາ ແລະທ່ອງທ່ຽວ ແຂວງດັກລັກ ສສ ຫວຽດນາມ ພ້ອມດ້ວຍຂະແໜງການກ່ຽວຂ້ອງ ໄດ້ມອບອຸປະກອນຮັບໃຊ້ການເຄື່ອນໄຫວວຽກງານວິຊາສະເພາະ ຄື: ຄອມພິວເຕີ 4 ຊຸດ ແລະກ້ອງ 4 ໜ່ວຍ ລວມມູນຄ່າ 260 ລ້ານດົ້ງ ໃຫ້ພະແນກ ຖະແຫຼງຂ່າວ, ວັດທະນະທໍາ ແລະທ່ອງທ່ຽວແຂວງເຊກອງ (ຖວທ) ແຂວງເຊກອງ ສປປ ລາວ,ຊຶ່ງກ່າວຮັບໂດຍທ່ານ ຈັນໄທ ຄໍາມະນີວົງ ຫົວຫນ້າພະແນກ ຖວທ ແຂວງເຊກອງ, ພ້ອມດ້ວຍຂະແໜງການກ່ຽວຂ້ອງເຂົ້າຮ່ວມເປັນສັກຂີພິຍານ.
ທ່ານ ຈັນໄທ ຄໍາມະນີວົງ ກ່າວວ່າ: ໃນໄລຍະຜ່ານມາ ຄະນະກໍາມະການປະຊາຊົົນແຂວງດັກລັກ ແລະອົງການປົກຄອງແຂວງເຊກອງ ໄດ້ມີການຮ່ວມມືກັນຫຼາຍດ້ານ ແລະສະເພາະວຽກງານວັດທະນະທໍາ ແລະທ່ອງທ່ຽວ ກໍໄດ້ມີການພົວພັນຮ່ວມມືກັນ ເຊິ່ງໃນປີ 2023 ຜ່ານມາ ພະແນກວັດທະນະທໍາ, ກິລາ ແລະທ່ອງທ່ຽວ ກໍໄດ້ນໍາເອົາສີລະປະ ມາສະແດງແລກປ່ຽນກັບແຂວງເຊກອ ເພື່ອເປັນການຜັນຂະຫຍາຍພົວພັນຮ່ວມມືຂອງສອງແຂວງດັກລັກ-ເຊກອງ ໃຫ້ເຂົ້າສູ່ລວງເລິກ.
