ໜ້າຫຼັກ / ການເຄື່ອນໄຫວ / ເລຂາພັກແຂວງເຊກອງ ຊີ້ນໍາເມືອງດາກຈຶງກະກຽມຄວາມພ້ອມໃຫ້ແກ່ການດໍາເນີນກອງປະຊຸມໃຫຍ່ອົງຄະນະພັກເມືອງ
ໃນໂອກາດເຂົ້າຮ່ວມເປັນປະທານ ແລະ ມີຄໍາເຫັນໂອ້ລົມຕໍ່ກອງປະຊຸມຄົບຄະນະບໍລິຫານງານພັກເມືອງ ທ້າຍສະໄໝທີ ດໍາເນີນຊີວິດການເມືອງ XV ແລະ ທາບທາມຄັດເລືອກບຸກຄະລາກອນ ສະໝັກເຂົ້າໃນໂຄງປະກອບຄະນະບໍລິຫານງານພັກເມືອງ ສະໄໝທີ XVI ຮອບທີ III ໃນວັນທີ 23 ມັງກອນ ຜ່ານມາ, ສະຫາຍ ເຫລັກໄຫລ ສີວິໄລ ກໍາມະການສູນກາງພັກ ເລຂາພັກແຂວງ ເຈົ້າແຂວງເຊກອງ ໄດ້ຊີ້ນໍາໃຫ້ຄະນະພັກ-ຄະນະນໍາເມືອງດາກຈຶງ ເອົາໃຈໃສ່ປັບປຸງດ້ານໂຄງສ້າງ, ເນື້ອໃນ ຂອງຮ່າງບົດລາຍງານການເມືອງ, ບົດສໍາຫລວດການນໍາພາລວມ ຂອງຄະນະບໍລິຫານງານພັກເມືອງສະໄໝທີ XV ໃຫ້ຖືກຕ້ອງສົມບູນ ຕິດພັນກັບການກໍານົດ ດ້ານໂຄງປະກອບບຸກຄະລາກອນ ແລະ ກໍານົດແຜນພັດທະນາເສດຖະກິດ-ສັງຄົມ ໃນ 5 ປີໃນຕໍ່ໜ້າ ໃຫ້ລະອຽດຊັດເຈນ, ມີຈຸດສຸມ ແລະ ແທດເໝາະກັບສະພາບຕົວຈິງ ຂອງທ້ອງຖິ່ນ.
ພ້ອມກັນນີ້, ກໍ່ເອົາໃຈໃສ່ໃນການສ້າງຂະບວນການຮອບດ້ານ ເປັນຕົ້ນ, ແມ່ນແຂ່ງກິລາ, ສິລະປະວັນນະຄະດີ, ຂະບວນການອອກແຮງງານ ຕິດພັນກັບການສົ່ງເສີມຂະບວນການຜະລິດເປັນສິນຄ້າ ຕາມທິດສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່ ເພື່ອຕອບສະໜອງການບໍລິໂພກພາຍໃນໃຫ້ພຽງພໍ ຫລຸດຜ່ອນການນໍາເຂົ້າ ແລະ ສົ່ງອອກຂາຍເປັນສິນຄ້າ, ພັດທະນາວຽກງານຂົງເຂດວັດທະນະທໍາ-ສັງຄົມ, ຫັນລົງກໍ່ສ້າງຮາກຖານການເມືອງ, ພັດທະນາຊົນນະບົດ, ແກ້ໄຂຄວາມທຸກຍາກ ແລະ ປະຕິບັດວຽກງານ 3 ສ້າງ, ໂຄສະນາສຶກສາອົບຮົມ ແລະ ປຸກລະດົມປະຊາຊົນບັນດາເຜົ່າ ປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ, ຕ້ານ ແລະ ແກ້ໄຂປະກົດການຫຍໍ້ທໍ້ ໂດຍສະເພາະແມ່ນບັນຫາຢາເສບຕິດ, ຂີ້ລັກງັດແງະ, ການຄ້າມະນຸດ ແລະ ອື່ນໆ ເພື່ອເຮັດໃຫ້ເມືອງດາກຈຶງສືບຕໍ່ມີສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະຫງົບ, ປະຊາຊົນສາມັກຄີປອງດອງ, ເສດຖະກິດຂະຫຍາຍຕົວ, ປະຊາຊົນມີຊີວິດການເປັນທີ່ດີ, ການກະກຽມ ແລະ ການດໍາເນີນກອງປະຊຸມໃຫຍ່ຜູ້ແທນອົງຄະນະພັກເມືອງ ສະໄໝທີ XVI ໃນມໍ່ໆນີ້ ໃຫ້ມີຄວາມໄພ ແລະ ສຳເລັດຕາມລະດັບຄາດໝາຍທີ່ວາງໄວ້.
