ໜ້າຫຼັກ / ການເຄື່ອນໄຫວ / ທົ່ວແຂວງເຊກອງ ມີຜູ້ນໍາໃຊ້ເລກໝາຍໂທລະສັບ 101.061 ເລກໝາຍ
ປັດຈຸບັນ, ທົ່ວແຂວງເຊກອງ ມີຜູ້ນຳໃຊ້ເລກໝາຍໂທລະສັບມືຖື, ແບບຕັ້ງໂຕະ ແລະ ແບບບໍ່ມີສາຍທັງໝົດ ຈຳນວນ 101.061 ເລກໝາຍ. ໃນນີ້, ໄດ້ລົງທະບຽນຜ່ານລະບົບໂປຼແກຼມ 3 ແກ໋ບແລ້ວ ຈໍານວນ 93.591 ເລກໝາຍ ເທົ່າກັບ 92,60 % ແລະ ອິນເຕີເນັດຜ່ານສາຍໄຟເບີ (FTTH) ຈຳນວນ 3.073 ບັນຊີ.
ທ່ານ ພົດສະໜາ ນິນທະນົນ ຫົວໜ້າພະແນກເຕັກໂນໂລຊີ ແລະ ການສື່ສານແຂວງ ໃຫ້ຮູ້ເມື່ອບໍ່ດົນນີ້ວ່າ: ຜ່ານມາ, ແຂວງເຊກອງໄດ້ເອົາໃຈໃສ່ຊຸກຍູ້ບໍລິສັດຜູ້ປະກອບການ ດ້ານໂທລະຄົມມະນາຄົມປັບປຸງການບໍລິການ ແລະ ຂະຫຍາຍເຄືອຂ່າຍສັນຍານໂທລະສັບອອກສູ່ຊົນນະບົດເຂດຫ່າງໄກຊອກຫລີກຢ່າງກວ້າງຂວາງ. ປະຈຸບັນ ມີເສົາຮັບ-ສົ່ງສັນຍານໂທລະສັບ BTS ຈໍານວນ 174 ຕົ້ນ, ມີສະຖານີຮັບ-ສົ່ງສັນຍານໂທລະສັບ 466 ສະຖານີ, ມີສາຍກາບໄຍແສງ (Fiber optic) ກວມເອົາ 4 ເມືອງ ມີຄວາມຍາວທັງໝົດ 1.666 km, ມີເຄື່ອຄ່າຍສັນຍານໂທລະສັບ ກວມເອົາ 94% ຂອງຈຳນວນບ້ານທົ່ວແຂວງ. ໃນນີ້, ເຄື່ອຄ່າຍສັນຍານໂທລະສັບ 2G ກວມເອົາ 94%, ສັນຍານ 3G ກວມເອົາ 67% ແລະ ເຄື່ອຄ່າຍສັນຍານໂທລະສັບ 4G ກວມເອົາ 67%. ພ້ອມກັນນີ້, ໄດ້ລົງຊຸກຍູ້ ຕິດຕາມ ແລະ ຄຸ້ມຄອງຜູ້ປະກອບດ້ານໄປສະນີ, ໂທລະຄົມມະນາຄົມ ແລະ ການສື່ສານ ຫັນເຂົ້າສູ່ລະບຽບກົດໝາຍ, ອອກໃບອະນຸຍາດນໍາໃຊ້ຄື້ນຄວາມຖີ່ວິທະຍຸສື່ສານໂຟນີໄດ້ 207 ເຄື່ອງ, ສາຂາຜູ້ໃຫ້ບໍລິການຮັບຝາກ, ຈັດສົ່ງ ແລະ ແຈກຢາກເຄື່ອງຝາກທາງໄປສະນີ 4 ສາຂາ ແລະ ອອກໃບຢັ້ງຄື້ນຄວາມຖີ່ເຄື່ອງບິນບໍ່ມີຄົນຂັບ (ໂດຣນ) 2 ເຄື່ອງ ແລະ ສໍາເລັດການລົງເຜີຍແຜ່, ຊຸກຍູ້ການຈັດຕັ້ງປະຕິບັດ ວຽກງານຫັນເປັນດີຈີຕ໋ອນ ແລະ ຄຸ້ມຄອງອິນເຕີເນັດໃຫ້ອົງການປົກຄອງ 4 ຕົວເມືອງ.
ທ່ານ ພົດສະໜາ ນິນທະນົນ ໃຫ້ຮູ້ຕື່ມວ່າ: ໃນປີ 2025 ນີ້, ແຂວງຈະສືບຕໍ່ສ້າງເງື່ອນໄຂໃນການພັດທະນາໂຄ່ງລາງພື້ນຖານໄປສະນີ, ໂທລະຄົມ ໃຫ້ຄວບຄຸມພື້ນທີ່ທົ່ວແຂວງ ສາມາດຮອງຮັບໃຫ້ແກ່ການຫັນເປັນອຸດສາຫະກໍາ-ທັນສະໄໝ ແລະ ເຂົ້າເຖິງເຂດຊົນນະບົດ-ຫ່າງໄກສອກຫລີກ, ຊຸກຍູ້ຜູ້ໃຫ້ບໍລິການດ້ານໂທລະຄົມສ້າງພື້ນຖານໂຄງລ່າງ ແລະ ຂະຫຍາຍຕາໜ່າງບໍລິການໂທລະຄົມມະນາຄົມໄປຍັັງເຂດທີ່ມີເງື່ອນໄຂ ໃຫ້ທົົ່ວເຖິ່ງ, ພັດທະນາລະບົບຫອ້ງການທັນສະໄໝ (E-office) ເພື່ອປະກາດໃຊ້ຢ່າງເປັນທາງການ, ຊຸກຍູ້-ສົ່ງເສີມບັນດາພະແນກການພາຍໃນແຂວງ ຫັນມານໍາໃຊ້ລະບົບບໍລິຫານລັດດ້ວຍເອເລັກໂຕຣນິກ (E-Office) ໃຫ້ຫລາຍຂຶ້ນ ແລະ ສືບຕໍ່ຄຸ້ມຄອງ, ຕິດຕາມ, ກວດກາບຸກຄົນ-ນິຕິບຸກຄົນ, ຫົວໜ່ວຍທຸລະກິດ ທີ່ໃຫ້ບໍລິການດ້ານໄປສະນີ ໃຫ້ຖືກຕ້ອງຕາມລະບຽບກົດໝາຍ.