ໜ້າຫຼັກ / ການເຄື່ອນໄຫວ / ປີ 2024 ແຂວງເຊກອງ ຜະລິດເຂົ້າເປືອກໄດ້ 46.000 ກວ່າໂຕນ
ການຜະລິດເຂົ້າເປືອກໃນທົ່ວແຂວງເຊກອງ ໃນປີ 2024 ຜ່ານມາ ສາມາດປະຕິບັດໄດ້ 11.402 ເຮັກຕາ, ເນື້ອທີ່ເກັບກ່ຽວ 11.402 ເຮັກຕາ, ຜົນຜະລິດລວມ 46.414 ໂຕນ, ທຽບໃສ່ແຜນ ເທົ່າກັບ 97,9% (ແຜນ 47.429 ໂຕນ), ທຽບໃສ່ປີ 2023 ເພີ່ມຂຶ້ນ 11,8%; ການຜະລິດພືດສະບຽງອາຫານ ປະຕິບັດໄດ້ 6.780 ເຮັກຕາ, ເນື້ອທີ່ເກັບກ່ຽວ 6.780 ເຮັກຕາ, ຜົນຜະລິດລວມ 57.343 ໂຕນ, ທຽບໃສ່ແຜນ ເພີ່ມຂຶ້ນ 52,6% (ແຜນການ 37.572 ໂຕນ), ທຽບໃສ່ປີ 2023 ເພີ່ມຂຶ້ນ 29,3%.
ທ່ານ ສາກົນ ພອນປະເສີດ ຫົວໜ້າພະແນກແຜນການ ແລະ ການລົງທຶນແຂວງ ລາຍງານ ໃນກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງເຊກອງ ຊຸດທີ II ເມື່ອບໍ່ດົນນີ້ ວ່າ: ນອກຈາກ, ການຜະລິດເຂົ້າ ແລະ ປູກພືດສະບຽງອາຫານແລ້ວ ແຂວງຍັງໄດ້ເອົາໃຈໃສ່ຊຸກຍູ້ ແລະ ສົ່ງເສີມການຜະລິດເປັນສິນຄ້າ ໂດຍສະເພາະສິນຄ້າທີ່ເປັນທ່າແຮງ ຂອງແຂວງ ທີ່ຕະຫລາດພາຍໃນ ແລະ ພາຍນອກມີຄວາມຕ້ອງ ເຊິ່ງສາມາດປະຕິບັດໄດ້ 28.359 ເຮັກຕາ, ເກັບກູ້ຜົນຜະລິດໄດ້ 334.425 ໂຕນ ທຽບໃສ່ແຜນ ເພີ້ມຂຶ້ນ 23,7% (ແຜນ 270.395 ໂຕນ). ໃນນີ້, ເນື້ອທີ່ປູກກາເຟ 10.401 ຮຕ, ເນື້ອທີ່ໃຫ້ໝາກ 7.999 ເຮັກຕາ, ຜົນຜະລິດ 38.544 ໂຕນ, ທຽບໃສ່ແຜນ ເທົ່າກັບ 71,4%; ໝາກແໜ່ງ 577 ເຮັກຕາ, ເນື້ອທີ່ເກັບກ່ຽວ 576 ເຮັກຕາ, ຜົນຜະລິດ 692 ໂຕນ, ທຽບໃສ່ແຜນ ເທົ່າກັບ 27,5%; ມັນຕົ້ນທາດແປ້ງ 14.865 ເຮັກຕາ, ຜົນຜະລິດ 255.483 ໂຕນ, ທຽບໃສ່ແຜນ ລື່ນແຜນ 58%; ສາລີ 19,5 ເຮັກຕາ, ຜົນຜະລິດ 139 ໂຕນ, ທຽບໃສ່ແຜນ ເທົ່າກັບ 1,7%; ກ້ວຍ 406 ເຮັກຕາ, ຜົນຜະລິດ 7.582 ໂຕນ, ທຽບໃສ່ແຜນ ເທົ່າກັບ 82%; ໂສມ 161 ເຮັກຕາ, ຜົນຜະລິດ 395 ໂຕນ, ທຽບໃສ່ແຜນ ເທົ່າກັບ 60,8%; ຜັກກະລໍ່າປີ 459 ເຮັກຕາ, ຜົນຜະລິດ 20.935 ໂຕນ, ທຽບໃສ່ແຜນ ລື່ນແຜນ 97,8% ແລະ ຜັກກາດຫໍ່ 299 ເຮັກຕາ, ຜົນຜະລິດ 7.166 ໂຕນ, ທຽບໃສ່ແຜນ ລື່ນແຜນ 117%.
ສໍາລັບການລ້ຽງສັດແບບເປັນຟາມ ທົ່ວແຂວງມີທັງໝົດ 16 ຟາມ. ໃນນີ້, ຟາມງົວ 3 ຟາມ ມີງົວ 113 ໂຕ, ຟາມໝູ 3 ຟາມ ມີໝູ 40.320 ໂຕ, ຟາມສັດປີກ 3 ຟາມ ມີສັດປີກ 1.551.550 ໂຕ ແລະ ຟາມປາ 7 ຟາມ ຜົນຜະລິດປາ 318 ໂຕນ; ການລ້ຽງສັດແບບເປັນກຸ່ມຄອບຄົວ ມີ 6 ກຸມ. ໃນນີ້, ກຸ່ມລ້ຽງຄວາຍ 1 ກຸ່ມ ມີ 5 ຄອບຄົວ ມີຄວາຍ 45 ໂຕ, ກຸ່ມລ້ຽງງົວ 1 ກຸ່ມ ມີ 33 ຄອບຄົວ ມີງົວ 896 ໂຕ, ກຸ່ມລ້ຽງໝູ 2 ກຸ່ມ ມີ 9 ຄອບຄົວ ມີໝູ 1.610 ໂຕ ແລະ ກຸ່ມລ້ຽງປາ 2 ກຸ່ມ ມີ 55 ຄອບຄົວ ຜົນຜະລິດປາ 297 ໂຕນ.
ທ່ານ ສາກົນ ພອນປະເສີດ ໃຫ້ຮູ້ຕື່ມວ່າ: ໃນປີ 2025 ນີ້, ແຂວງເຊກອງໄດ້ວາງເປົ້າໝາຍສູ້ຊົນຜະລິດເຂົ້າໃຫ້ໄດ້ 48.566 ໂຕນ, ຜະລິດພືດສະບຽງອາຫານ 49.580 ໂຕນ, ສົ່ງເສີມການປູກພຶດເປັນສິນຄ້າ ໃຫ້ໄດ້ 29.274 ເຮັກຕາ, ຜົນຜະລິດ 272.759 ໂຕນ ແລະ ສູ້ຊົນກະຜະລິດຊີ້ນ, ປາ ແລະ ໄຂ່ ໃຫ້ໄດ້ 6.630 ໂຕນ ເພື່ອສະໜອງການບໍລິໂພກພາຍໃນ ແລະ ຂາຍເປັນສິນຄ້າສົ່ງອອກ ເພື່ອທົດແທນການນໍາເຂົ້າ. ພ້ອມກັນນີ້, ຊຸກຍູ້ການລຽ້ງສັດແບບເປັນຟາມ ແລະ ການລ້ຽງເປັນກຸ່ມແບບຄອບຄົວໃຫ້ເພີ່ມຂຶ້ນ.
