ໃນວັນທີ 10 ມິຖຸນາ 2025 ນີ້, ຄະນະພັກຮາກຖານຫ້ອງວ່າການແຂວງ ໄດ້ເລືອກເອົາຜູ້ແທນສົມບູນ ແລະສໍາຮອງ ເພື່ອເຂົ້າຮ່ວມກອງປະຊຸມໃຫຍ່ຄັ້ງທີ XI ຂອງອົງຄະນະພັກແຂວງເຊກອງ ຢູ່ທີ່ຫ້ອງປະຊຸມຊັ້ນ 3 ຫ້ອງວ່າການແຂວງ ໂດຍການເປັນປະທານຂອງສະຫາຍ ບຸນຫລາຍ ບຸດທິ ຮອງເລຂາພັກແຂວງ, ຜູ້ຊີ້ນຳວຽກພັກ-ພະນັກງານ, ມີບັນດາສະຫາຍສະມາຊິກພັກ, ພະນັກງານສະມາຊິກພັກທີ່ບໍານານ ພ້ອມດ້ວຍຄະນະຮັບຜິດຊອບຂັ້ນແຂວງເຂົ້າຮ່ວມ.

ໂອກາດນີ້, ສະຫາຍ ບຸນຫລາຍ ບຸດທິ ໄດ້ເນັ້ນໃຫ້ຄະນະພັກ, ສະມາຊິກພັກທຸກສະຫາຍ ເອົາໃຈໃສ່ຄົ້ນຄວ້າ ພິຈາລະນາຢ່າງເລິກເຊິ່ງໃນການປ່ອນບັດຄັດເລືອກເອົາຜູ້ແທນສົມບູນ ແລະສໍາຮອງ ຜູ້ທີ່ມີມາດຖານເງື່ອນໄຂຄົບຖ້ວນ, ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ເປັນແບບຢ່າງນໍາໜ້າໃນການປະຕິບັດໜ້າທີ່ການເມືອງ ດ້ວຍຄວາມຮັບຜິດຊອບສູງ, ມີສຸຂະພາບແຂງແຮງດີ, ຊຶ່ງຜູ້ແທນສົມບູນ ແລະສໍາຮອງ ທີ່ຈະເຂົ້າຮ່ວມກອງປະຊຸມໃຫຍ່ອົງ ຄະນະພັກແຂວງ ຕ້ອງໄດ້ຮັບການເລືອກຈາກສະມາຊິກພັກ ແຕ່ 50% ຂຶ້ນໄປ.

ຈາກນັ້ນ, ສະຫາຍ ນາງ ກອງມະນີ ສຸວັນນະສານ ຮອງຫົວໜ້າຄະນະຈັດຕັ້ງແຂວງ ໄດ້ຂຶ້ນຜ່ານມາດຕະຖານ, ເງື່ອນໄຂ ຂອງຜູ້ແທນສົມບູນ, ຜູ້ແທນສໍາຮອງ, ພ້ອມນັ້ນ, ກໍໄດ້ປ່ອນບັດເລືອກເອົາຜູ້ແທນສົມບູນ ແລະສໍາຮອງ ຊຶ່ງເລືອກໄດ້ ສະຫາຍ ໂພໄຊ ພິມມະສອນ ແລະສະຫາຍ ອ່ຽງຄໍາ ລັດຖະສົມບັດ ເປັນຜູ້ແທນສົມບູນ, ເລືອກໄດ້ ສະຫາຍ ອຸ່ນເຮືອນ ໄຊຍະວົງ ເປັນຜູ້ແທນສໍາຮອງ ເພື່ອເຂົ້າຮ່ວມກອງປະຊຸມໃຫຍ່ຄັ້ງທີ XI ຂອງອົງຄະນະພັກແຂວງ ທີ່ຈະໄຂຂຶ້ນໃນເດືອນສິງຫາ ຕໍ່ໜ້ານີ້.