Thateng Farm & Resort

       ທ່າແຕງຟາມ ແລະ ຣີສອດ ຫຼືເອີ້ນອີກຢ່າງໜຶ່ງແມ່ນໜອງເຮືອເປັດ ຕັ້ງ ຢູ່ບ້ານໂກງຕາຢູນ ເມືອງທ່າແຕງ ແຂວງເຊກອງ ຫ່າງຈາກເທສະບານແຂວງເຊກອງ ປະມານ  48 ກິໂລແມັດ ແລະ ຫ່າງຈາກເທສະບານເມືອງ 4 ກິໂລແມັດ ທ່າແຕງຟາມ ແລະ ຣີສອດ ສ້າງຕັ້ງຂຶ້ນ ໃນຕົ້ນປີ 2016 ເປັນຕົ້ນມາເຊິ່ງມີເນື້ອທີ່ທັງໜົດ ປະມານ 20 ກວ່າເຮັກຕາ, ທຳອິດແມ່ນເຮັດກະສິກຳຫຼາຍຢ່າງ ໂດຍສະເພາະແມ່ນ ປູກຝັງ, ລ້ຽງສັດ ຕໍ່ມາໄດ້ມີການຫັນປ່ຽນມາເປັນສະຖານທີ່ທ່ອງທ່ຽວ ເພາະເຫັນວ່າເປັນເຂດພູພຽງ ເຊິ່ງມີອາກາດເຢັນຕະຫຼອດປີ ແລະ ເປັນຈຸດໃຈກາງເຊື່ອມຕໍ່ ລະຫວ່າງ 3 ແຂວງພາກໃຕ້ ຄື: ຈໍາປາສັກ, ສາລະວັນ ແລະ ອັດຕະປື.

     ປະຈຸບັນທ່າແຕງຟາມ ແລະ ຣີສອດມີສິ່ງທີ່ໜ້າສົນໃຈ ແລະ ກິດຈະກຳເປັນຈໍານວນຫຼວງຫຼາຍເຊັ່ນວ່າ: ຂີ່ສະລີ່ງຂ້າມໜອງໃຫຍ່ ໄລຍະຄວາມໄກ 200 ແມັດ, ຖີບເຮືອເປັດເປັນລົດຖີບ, ຂີ່ລົດ ATV , ສວນສະນຸກສະເພາະ ເດັກນ້ອຍອີກດ້ວຍ,  ນອກຈາກນີ້ຍັງມີປະເພດສັດໃຫ້ໄດ້ເບິ່ງໄດ້ຊົມເປັນຕັ້ນແມ່ນ ແກະ, ກວາງດາວ, ນົກຍູງ ແລະ ອື່ນໆອີກ.

    ທ່າແຕງຟາມ ແລະ ຣີສອດ ຍັງເປັນສະຖານທີ່ທ່ອງທ່ຽວທີ່ອຳນວຍຄວາມສະດວກຫຼາຍຢ່າງເຊັ່ນວ່າ: ຮ້ານອາຫານ, ຮ້ານກາເຟ,  ແລະ ທີ່ພັກເຊົາ, ນອກຈາກນີ້ ທ່າແຕງຟາມ ແລະ ຣີສອດ  ຍັງມີສ່ວນຮ່ວມໃນການສ້າງວຽກເຮັດງານທຳໃຫ້ແກ່ປະຊາຊົນບ້ານອ້ອມຂ້າງ ໄດ້ເຂົ້າມາເຮັດວຽກ ແລະ ຍັງໄດ້ຮັບຊື້ວັດຖຸດິບບາງຢ່າງທີ່ປະຊາຊົນບ້ານອ້ອມຂ້າງໄດ້ມາຂ່າຍ ສາມາດສ້າງລາຍຮັບໃຫ້ປະຊາຊົນເພື່ອລ້ຽງຊີບ ລ້ຽງຄອບຄົວອີກດ້ວຍ.

ປະຫວັດຄວາມເປັນມາບ້ານກັນດອນໃໝ່ : ເປັນບ້ານ ທ່ອງທ່ຽວທາງດ້ານວັດທະນະທຳ ແລະ ສຶກສາວິຖີການດຳ ລົງຊີວິດຂອງເຜົ່າກະຕູ, ບ້ານກັນດອນເປັນໝູ່ບ້ານທີ່ໄດ້ຍ້າຍມາແຕ່ເມືອງກະລຶມ ມາຕັ້ງຖິ່ນຖານຢູ່ເມືອງທ່າແຕງ, ເຊີ່ງຕັ້ງຢູ່ຫ່າງຈາກເທດສະບານເມືອງທ່າແຕງ ປະມານ 21 ກິໂລແມັດ ເປັນບ້ານທີ່ສ້າງຕັ້ງຂື້ນໃນປີ 1996 ຕາມປະຫວັດຄວາມເປັນມາຂອງຊາວບ້ານ, ແມ່ນຍ້າຍມາຈາກບ້ານກັນດອນເກົ່າ ທີ່ຕັ້ງຢູ່ໃກ້ກັບ ຊາຍແດນ ລາວ - ຫວຽດນາມ ເຊີ່ງຂື້ນກັບເມືອງ ກະລືມ ແຂວງເຊກອງ ໃນເບື້ອງຕົ້ນປະຊາຊົນຍົກຍ້າຍເຂົ້າມາຕັ້ງຖີ່ນຖານທຳອິດ ມີ: 128 ຄົວເຮືອນ,ມີ 65 ຫຼັງຄາເຮືອນ ມີພົນລະເມືອງທັງໝົດ 685 ຄົນ, ຍິງ 380 ຄົນ ເຊີ່ງເປັນຊົນເຜົ່າກະຕູ ໃນການຍົກຍ້າຍມາຕັ້ງຖີ່ນຖານ ແມ່ນນຳພາໂດຍທ່ານ ວິພັດ, ທ່ານ ແສງບົນ, ທ່ານ ບຸນເພງ, ທ່ານ ທອງ ເຊີ່ງໄດຍົກຍ້າຍໃນຄັ້ງວັນທີ 11 ເມສາ 1996 ເຫດຜົນຂອງການຍົກຍ້າຍ ແມ່ນຍ້ອນເສັ້ນທາງຄົມມະນາຄົມບໍ່ສະດວກ, ທີ່ພາໃຫ້ການປີ້ນປົວທາງດ້ານສຸຂະພາບ ແລະ ການສຶກສາບໍ່ສາມາດເຂົ້າເຖີ່ງໄດ້ ແລະ ອີກດ້ານໜື່ງ ແມ່ນເນື້ອທີ່ດິນບໍ່ເໝາະສົມໃນການຜະລິດ ເຊີ່ງເຮັດໃຫ້ຜົນຜະລິດໄດ້ຕ່ຳ ບໍ່ພຽງພໍກັບຄວາມຕ້ອງການໃນຊີວິດປະຈຳວັນ ໂດຍສະເພາະແມ່ນເຂົ້າກິນ, ສະນັ້ນບັນດາທ່ານຈິ່ງໄດ້ປຶກສາຫາລື ນຳອຳນາດການປົກຄອງເມືອງ, ແຂວງ ແລະ ສະມາຊິກພາຍໃນບ້ານ ຈາກນັ້ນຈິ່ງພາກັນຍົກຍ້າຍ ໃນປະຈຸບັນນີ້ບ້ານກັນດອນໃໝ່ ປະກອບມີ 6 ຊົນເຜົ່າ: ເຜົ່າກະຕູ, ແງ, ສ່ວຍ, ແຢະ, ອາຫຼັກ ແລະ ລາວລຸ່ມ ໃນ ປີ 2015 ມີ 245 ຄອບຄົວ, ມີ 153 ຫຼັງຄາເຮືອນ ແລະ ມີພົນລະເມືອງ ທັງໝົດ 1,220 ຄົນ ຍິງ 651 ຄົນ ເຊີ່ງສາມາດຢູ່ຮ່ວມກັນໄດ້ຢ່າງມີຄວາມສາມັກຄີ ຊ່ວຍເຫຼື່ອເຊີ່ງກັນ ແລະ ກັນ.

ນໍ້າຕົກຕາດໄຟໄໝ້ ເປັນໜຶ່ງໃນຈໍານວນສະຖານທີ່ທ່ອງທ່ຽວທາງທໍາມະຊາດທີ່ມີຊື່ສຽງ ຂອງເມືອງທ່າແຕງ ແຂວງເຊກອງ ເໝາະແກ່ການພັກຜ່ອນຢ່ອນໃຈ ເຊິ່ງເປັນແຫຼ່ງທ່ອງທ່ຽວທາງທໍາມະຊາດທີ່ມີຄວາມສວຍສົດງົດງາມ ແລະ ຮັກສາຄົງເດີມຄວາມເປັນ ທໍາມະຊາດທີ່ສຸດ ເປັນຕາດທີ່ຕັ້ງຢູ່ສາຍນໍ້າຫ້ວຍລະວັນ ບໍລິເວນເຂດບ້ານປະແຫຼງໃຕ້, ເມືອງທ່າແຕງ, ແຂວງເຊກອງ ເຊິ່ງຫ່າງຈາກເທດສະບານເມືອງດັ່ງກ່າວໄປທາງທິດເໜືອ ປະມານ 8 ກິໂລແມັດ, ມີຄວາມສູງປະມານ 100 ແມັດ ແລະ ກວ້າງ 20 ແມັດ. ເຊິ່ງໄດ້ເປີດໃຫ້ບໍລິການແກ່ນັກທ່ອງທ່ຽວ ແລະ ເປັນທີ່ນິຍົມຈາກນັກທ່ອງທ່ຽວທັງພາຍໃນ ແລະຕ່າງປະເທດ ແຕ່ປີ 2008 ເປັນຕົ້ນມາ.

ອີງຕາມການບອກເລົ່າຂອງຜູ້ເຖົ້າຜູ້ແກ່ ໃຫ້ຮູ້ວ່າ: ແຕ່ກີ້ແຕ່ກ່ອນມີບ່າວສາວຄູ່ໜຶ່ງມາຫຼິ້ນນໍ້າຢູ່ບໍລິເວນ ຕາດແຫ່ງນີ້ ຈົນເຄື່ອງນຸ່ງປຽກໝົດ ທັງສອງຈຶ່ງໄດ້ພາກັນດັງໄຟຝີງ ແລະ ຕາກເຄື່ອງນຸ່ງປະໄວ້ ຕໍ່ມາບັງ ເອີນມີລົມພັດແຮງ ພັດເອົາເຄື່ອງນຸ່ງຂອງທັງສອງຄົນເຂົ້າກອງໄຟ ເຮັດໃຫ້ເຄື່ອງນຸ່ງຂອງທັງສອງໄໝ້ ຈົນກ້ຽງ ສະນັ້ນ ຈຶ່ງເປັນທີ່ມາຂອງຊື່ “ຕາດໄຟໄໝ້” ຈົນເຖິງປັດຈຸບັນ.

ສວນສີໜຸກ ຕັ້ງຢູ່ບ້ານໂກງຕາຢູນ ເມືອງ ທ່າແຕງ ແຂວງເຊກອງ ເປັນຈຸດທ່ອງທ່ຽວ ດ້ານກະສິກຳປອດສານພິດເປັນຕົ້ນ: ປູກກາເຟ,ໜໍ່ໄມ້ ແລະ ພຶດຜັກອື່ນໆ ທີ່ເປັນການດຶງດູດນັກທ່ອງທ່ຽວ ແລະ ສ້າງຄວາມປະທັບໃຈແກ່ແຂກທັງພາຍໃນ ແລະ ຕ່າງປະເທດ ຈາກນັ້ນ, ກໍປະກອບມີສິ່ງເອື້ອອຳນວຍຄວາມສະດວກຕ່າງໆ  ເຊັ່ນ:ສະຖານທີ່ພັກແຮມ,ຮ້ານອາຫານ ແລະ ເຄື່ອງດື່ມຕາມທີ່ທ່ານຕ້ອງການ ພ້ອມທັງມີການ ບໍລິການນຳທ່ຽວທຳມະຊາດສວນກາເຟ ແລະ ສະຖານທີ່ແຫ່ງ ອື່ນໆ ຕື່ມອີກ ພິເສດທ່ານຈະໄດ້ຊີມ ແລະ ຊື້ກາເຟສີໜຸກ ທີ່ມີລົດຊາດໜຶ່ງດຽວ ທີ່ເປັນເອກະລັກຂອງຊາວເມືອງ ທ່າແຕງ ແຂວງເຊກອງ.

booking@sinoukcoffeeresort.com Philippe.sinoukcoffee@gmail.com

ປະຫວັດຄວາມເປັນມາຂອງເສົາຫຼັກເມືອງ

       ຫຼັກເມືອງແມ່ນບ່ອນສັກກະລະບູຊາ ແລະ ສູນລວມຈິດໃຈຂອງປະຊາຊົນແຂວງເຊກອງ, ເປັນສູນລວມຂອງການເຮັດກິດຈະກໍາຮ່ວມກັນຂອງປະຊາຊົນບັນດາເຜົ່າ, ເປັນຕົວແທນທີ່ບົ່ງບອກເຖິງຈຸດທີ່ຕັ້ງ ຂອງຕົວເມືອງ, ເປັນເອກະລັກສະເພາະທີ່ພົ້ນເດັ່ນຂອງທ້ອງຖິ່ນ ທັງເປັນຕົວແທນຂອງຄວາມເຊື່ອ ແລະ ເປັນຕົວແທນແຫ່ງໄຊຊະນະອີກດ້ວຍ. 

       ຫຼັກເມືອງ ແຂວງເຊກອງ ແມ່ນສູນລວມທາງຈິດໃຈ ແລະ ໄດ້ສັງລວມເອົາ ວັດທະນະທຳຂອງຊາວແຂວງເຊກອງ  ສະຫຼັກໄວ້ໃນຫຼັກເມືອງ ເພື່ອອະທິບາຍເຖິງ ປະຫວັດ ແລະ ຄວາມສຳຄັນຂອງວິຖີຊີວິດ ແບບດັ້ງເດີມຂອງປະຊາຊົນ ໃຫັຍັງຄົງຢູ່ຕະຫຼອດຈົນຮອດເຊັ່ນລູກເຊັ່ນຫຼານ.

        ສະນັ້ນເສົາຫຼັກເມືອງຈຶ່ງໄດ້ອອກແບບໃຫ້ຮູບຊົງຄືກັນກັບ “ຫຼັກເສັ້ນໄຫວ້” ທີ່ຕັ້ງຢູ່ໜ້າເຮືອນຂອງປະຊາຊົນບັນດາເຜົ່າ ເຊີ່ງເຮົາສັງເກດເຫັນໄດ້ຕາມເຂດນອກ ເທສະບານອອກໄປ ເຊີ່ງເສົານີ້ແມ່ນ ຕົວແທນຂອງບັນພະບູລຸດ “ຢະຢໍ” ດັ່ງນັ້ນໃນແຕ່ລະປີ ເຂົາເຈົ້າຈຶ່ງມີການເຮັດພິທີສັກກາລະບູຊາ ເສົາປະຈຳເຮືອນ ປະຈຳບ້ານຕາມຄວາມເຊື່ອຖືຂອງປະຊາຊົນບັນດາເຜົ່າ.

ເຊິ່ງມີຄວາມໝາຍສະແດງເຖີງ ຄວາມເຄົາລົບບູຊາ ຜູ້ຮັກສາບ້ານເຮືອນໃຫ້ຢູ່ດີມີສຸກ, ປົກປ້ອງຄົນທີ່ຢູ່ໃນບ້ານເຮືອນ ຈາກສິ່ງທີ່ບໍ່ດີຈະເຂົ້າມາໃນບ້ານເຮືອນ ນອກຈາກນີ້ປະຊາຊົນບັນດາເຜົ່າກ່ອນທີ່ຈະລົງທຳການຜະລິດຕ່າງໆ ກໍ່ຕ້ອງໄດ້ໄຫວ້ບູຊາໃຫ້ສິ່ງສັກສິດບັນດານໃຫ້ໄດ້ຮັບໝາກຜົນດີ ເຊິ່ງເອີ້ນວ່າ: “ ພິທີກິນຮີດ ”  ນັ້ນເອງ.

ຄວາມໝາຍຂອງເສົາຫຼັກເມືອງ

    ເສົາຫຼັກເມືອງແຂວງເຊກອງ ຕັ້ງຢູ່ບ້ານໃໝ່ຫົວເມືອງ ເມືອງລະມາມ ແຂວງເຊກອງ ເຊິ່ງເປັນຈຸດສາມແຍກທຳອິດ ກ່ອນຈະເຂົ້າເທສະບານ ແຂວງເຊກອງ ເປັນຈຸດທີ່ມີຄວາມສູງ ເດັ່ນສະຫງ່າ ແລະ ປິ່ນໜ້າໄປທາງທິດເໜືອ ເຊີ່ງເປັນທິດຫຼັກຂອງ 4 ທິດ (ທິດດາວພະສຸກ) ສາເຫດທີ່ເລືອກທີ່ຕັ້ງຢູ່ບ່ອນນີ້ກໍ່ຍ້ອນວ່າ: ໃຫ້ສອດຄ່ອງກັບແນວຄິດຂອງການອອກແບບທີ່ໄດ້ອະທິບາຍມາໃນຂ້າງເທິງນັ້ນຄື: ເສົາຫຼັກເມືອງນີ້ປຽບດັ່ງເສົາຢູ່ຕໍ່ໜ້າເຮືອນຂອງປະຊາຊົນ, ເຜົ່າທີ່ຖືເປັນເສົາສັກສິດ ທີ່ຜີປູ່ຜີຍ່າ (ຢະຢໍ)ສິງສະຖິດຢູ່ໃນນັ້ນ ( ຕາມຄວາມເຊື່ອ )  ເຊີ່່ງຕັ້ງຢູ່ເບື້ອງຫົວເຮືອນຫຼືໜ້າເຮືອນ ສະນັ້ນເສົາຫຼັກເມືອງຈິ່ງຕັ້ງຢູ່ໜ້າເມືອງ ຫຼື ຫົວເມືອງເຊັ່ນກັນ.

ເຂດສັກກະລະບູຊາ ພາກສ່ວນເສົາຫຼັກເມືອງ

   ເສົາຫຼັກເມືອງສູງ 9 ແມັດ,ມີຕຸ່ມຢູ່ຫົວເສົາ 9 ຕຸ່ມ,ເພື່ອຍົກຄຸນຄ່າໃຫ້ແກ່ສິ່ງຍອດຍິ່ງໃຫ້ໂດດເດັ່ນ ໂດຍຖືເອົາເລກ 9 ເປັນເລກມຸງຄຸນໃນກຸ່ມຕົວເລກທັງໝົດ ແລະ ມີບາລະມີໃຫ້ແກ່ເສົາຫຼັກເມືອງ ສະນັ້ນຈຶ່ງສ້າງຖານຂຶ້ນສູງ ແລະ ສາເຫດທີ່ເລືອກເລກ 9 ໃຊ້ໃນການອອກແບບ ແມ່ນອີງໃສ່ຄວາມເຊື່ອທາງດ້ານສາສະໜາ ເຊິ່ງເລກ 9 ໝາຍເຖິງເລກສູງສຸດ ເປັນເລກງາມຍາມດີ, ເລກມຸງຄຸນ ເປັນຕົວແທນແຫ່ງໂຊກລາບ ແລະ ເປັນກຸ່ມໝູ່ດາວ 9 ດວງ ທີ່ປິ່ນອ້ອມດວງຕະເວັນ ຄື ສຸດຍອດຄວາມເຊື່ອດ້ານຈັກກະວານ ທີ່ຜູ້ຄົນຍຶດຖືເປັນທີ່ເພິ່ງທາງໃຈ.

1. ໜ່ວຍຕະເວັນຢູ່ເທິງຫົວເສົາແມ່ນໝາຍເຖິງ ການກະຈາຍຄວາມອຸດົມສົມບູນທຸກ ສາລະທິດ ພ້ອມທັງໝາຍເຖີງຕະເວັນທີ່ສ່ອງແສງປະກາຍອອກທົ່ວສາລະທິດນອກນັ້ນ ຍັງສື່ຄວາມໝາຍວ່າ: “ ແຂວງ ເຊກອງເປັນແຂວງຕາເວັນອອກ” ອີກດ້ວຍ.
2. ຢູ່ເທີງຫົວເສົາມີ 3 ຂໍ້ນັ້ນໜາຍເຖີງຕົວແທນທາງດ້ານພຸດທະສາສະໜາຄື : ພະພຸດ, ພະທໍາ,ພະສົງ ເນື່ອງຈາກວ່າເສົາຫຼັກເມືອງແມ່ນຕົວແທນທາງດ້ານວັດທະນະທຳຂອງແຂວງອີກຢ່າງພຸດທະສາສະໜາຍັງເປັນຄວາມເຊື່ອໜຶ່ງທີ່ມີອິດທີພົນຕໍ່ທາງດ້ານຈິດໃຈຂອງປະຊາຊົນທີ່ຢູ່ໃນແຂວງເຊກອງດ້ວຍເຊິ່ງເຫັນໄດ້ຈາກການສ້າງຕັ້ງວັດວາອາຣາມໄດ້ມີການຂະຫຍາຍ ຕົວ ກວມເກືອບທຸກບ້ານໃນເທສະບານແຂວງໃນປະຈຸບັນ.
3. ລວດລາຍຂອງເສົາ ສິ່ງທີ່ບົ່ງບອກຄວາມເປັນເອກະລັກຂອງບັນດາເຜົ່າແມ່ນການແຕ່ງກາຍ ແລະ ລວດລາຍຂອງຜ້າທີ່ເປັນລວດລາຍອ້ອມເສົາຫຼັກເມືອງ ໝາຍເຖີງສິລະປະດັ້ງເດີມຂອງບັນດາເຜົ່າ ເຊິ່ງມັກເຫັນຫຼາຍໃນລວດລາຍຂອງຜ້າກະໂດຂອງບັນດາຊົນເຜົ່າໃນແຂວງເຊກອງ ສະນັ້ນ ຈິ່ງໄດ້ຖອດເອົາລວດລາຍທີ່ໂດດເດັ່ນອອກມາປະກອບກັບງານສ້າງສັນດ້ານສີລະປະຈິ່ງອອກມາຢ່າງຈົບງາມດັ່ງທີ່ເຫັນ.
4. ຢູ່ຕີນຖ້ານເສົາຈະມີຫອກ 4 ເຫຼັ້ມ ເປັນເຄື່ອງມືໃນການຕໍ່ສູ້ກູ້ຊາດຂອງນັກຮົບ ແມ່ນເປັນຕົວແທນການປ້ອງກັນສິ່ງຊົ່ວຮ້າຍທີ່ຈະເຂົ້າມາທຸກສາລະທິດ ແລະ ໃນຫອກແຕ່ລະເຫຼັ້ມ ຈະແກະສະຫຼັກລວດລາຍສັດ 4 ໂຕຄື: ລີງ, ງູ, ກັບແກ້ ແລະ ນົກເຄົ້າ ສັດເຫຼົ່ານີ້ ຈະເປັນສັດໃນຄວາມເຊື່ອຂອງປະຊາຊົນບັນດາເຜົ່າ
5. ແຕ່ລະດ້ານຂອງຖານຈະມີເຂນ ແລະ ດາບນັ້ນປຽບດັ່ງຜູ້ອາລັກຂາທະຫານຍາມເສົາຫຼັກເມືອງທັງນີ້ກໍ່ຍ້ອນວ່າ: ທຸກສິ່ງຢ່າງທີ່ເປັນອັນສຳຄັນກໍ່ຕ້ອງມີຜູ້ຮັກສາ ແລະ ອີກຢ່າງໜຶ່ງຢາກບອກໃຫ້ເຫັນເຖິງວ່າ ແຂວງເຊກອງ ແມ່ນແຂວງໜຶ່ງທີ່ຕິດພັນກັບປະຫັວດສາດລາວມີບັນພະບູລຸດທີ່ເກັ່ງກ້າສາມາດປະກອບສ່ວນເຂົ້າໃນການຕໍ່ສູ້ກູ້ຊາດໃນເມື່ອກ່ອນຈົນໄດ້ຮັບເອກະລາດໃນປະຈຸບັນ.
6. ຮູບປັ້ນໂນນສັດທີ່ມີອິດທິພົນໃນການດໍາລົງຊີວິດຂອງປະຊາຊົນບັນດາເຜົ່າ ຈະມີສັດ 2 ປະເພດຄື: ປະເພດສັດລຽ້ງ ແລະ ປະເພດສັດທີ່ເປັນລາງບໍ່ດີ ບອກເຫດຮ້າຍທີ່ຈະເກີດຂຶ້ນຕາມຄວາມເຊື່ອຂອງປະຊາຊົນ.
7. ຮູບປັ້ນໂນນວິຖີຊີວິດດັ້ງເດີມທີ່ມີໃນແຂວງເຊກອງນີ້ໂດຍແຕ່ລະປີຈະບອກໃຫ້ເຫັນວ່າເຂົາເຈົ້າໄດ້ປະກອບກິດຈະກຳຫຍັງແດ່.

ໝໍ້ທອງ ແລະ ໄຫເຫຼົ້າ

1. ໝໍ້ທອງ : ແມ່ນໃສ່ນ້ຳເພື່ອຕື່ມເຫຼົ້າໄຫໂດຍມີເຂົາຄວາຍເປັນປະທັດ ອີກຢ່າງໃສ່ເຫຼົ້າສາໂທ, ເຫຼົ້າຂະໜຽນຂອງເຜົ່າຕ່າງໆພາຍໃນແຂວງ.
2. ໄຫເຫຼົ້າ : ແມ່ນໃຊ້ສໍາລັບໃສ່ເຫຼົ້າສາໂທ, ເຫຼົ້າເຂົ້າຂະໜຽນໄວ້ກິນຍາມດອງ, ຍາມບຸນປະເພນີຕ່າງໆ.ລວມທັງ 2 ຢ່າງ ໝໍ້ທອງ ແລະ ໄຫເຫຼົ້າແມ່ນເປັນຊັບສົມບັດອັນມີຄ່າ ເພື່ອແຕ່ງເປັນຄ່າດອງຕາງ ງົວ, ຄວາຍ ເຊີ່ງເຫຼົ້າ ແລະ ໝໍ້ທອງ 1 ຄູ່ ແມ່ນເທົ່າກັບຄວາຍ 5 ໂຕ, ນອກນັ້ນຍັງສະແດງເຖີງອໍານາດບາລະມີ ເພື່ອເປັນໂຊກລາບໃຫ້ແກ່ຕົວເມືອງ ໃນການຮຽກເອີ້ນຄວາມອຸດົມສົມບູນຈາກສີ່ທິດຄື: ໄຫເງິນ, ໄຫຄໍາ, ໄຫທອງ, ແລະ ໄຫແກ້ວ ໃຫ້ແຂວງເຊກອງຂອງເຮົາອຸດົມສົມບູນ ແລະ ຮັ່ງມີຕະຫຼອດໄປ.

          - ຫຸ່ນຄົນ 10 ຄູ່ ທາງດ້ານໜ້າ ຄວາມຫຼາກຫຼາຍຂອງວັດທະນະທຳຄື ຄວາມສວຍງາມປະດັບຊາດ ໝາຍເຖີງບັນດາເຜົ່າດັັ່ງເດີມ ທີ່ມີໃນແຂວງເຊກອງດ້ວຍຄວາມຫຼາກຫຼາຍທາງດ້ານວັດທະນະທຳລັກສະນະຂອງການແຕ່ງກາຍທີ່ບົ່ງບອກເຖິງເອກະລັກຂອງແຕ່ລະເຜົ່າ ແລະ ລວມທັງອຸປະກອນ, ອາວຸດຫາກິນ, ເຄື່ອງໃຊ້,ເຄື່ອງປະດັບເອ້ຍ້ອງຄົບຊຸດພ້ອມນັ້ນຫຸ່ນ 10 ຄູ່ນີ້ຍັງເປັນຕົວແທນຜູ້ຮັກສາສິ່ງສັກສິດອັນລໍ້າຄ່າຂອງມະເຫສັກຫຼັກເມືອງແຫ່ງນີ້ອີກດ້ວຍ.

     ງານສະເຫຼີມສະຫຼອງບຸນສວນຫຼັກເມືອງແມ່ນຈັດຂຶ້ນໃນມື້ 13, 14, 15 ຄໍ່າ ເດືອນຍີ່ເພັງຂອງທຸກໆປີ.

ແຫຼ່ງ​ທ່ອງທ່ຽວ​ ແກ້ງຫຼວງ ຕັ້ງຢູ່ບ້ານນາວາ ເມືອງ​ລະມາມ​ ແຂວງເຊກອງ.​ ແມ່ນແກ້ງ ທີ່ເກີດຕາມສາຍນ້ຳເຊກອງ,​ ເປັນແກ້ງທີ່ໃຫ່ຍ ແລະ​ ຍາວ 2 km,​ ຫ່າງຈາກເທດສະບານແຂວງ​ 15 Km,​ ມີເສັ້ນທາງພັດທະນາເຂົ້າເຖິງແລ້ວເປີດບໍລິການຮັບໃຊ້ໃນປີ 1999. ແກ້ງຫຼວງແມ່ນແກ້ງທີ່ໃຫ່ຍກວ່າໝູ່ໃນສາຍນ້ຳແຂວງເຊກອງ,​ ໃນເມື່ອກ່ອນເພິ່ນເອີ້ນວ່າ: ແກ້ງໃຫ່ຍ ຕໍ່ມາໃນສະໄໝຝຣັ່ງປົກຄອງ ຈິ່ງປ່ຽນຊື່ມາເປັນ " ແກ້ງຫຼວງ​"​ ເພາະຫຼວງໄດ້ມາຕັ້ງຈຸດເກັບເກນເອົາຊັບສິນເງິນຄຳ ໃຫ້ຝຣັ່ງ ລົງໃສ່ເຮືອກໍ່າປັ່ນ ຢູ່ປະເທດຂະແມ ຫຼື​ ຂະເໝນ​ ໃນສະໄໝຝຣັ່ງປົກຄອງ ຈິ່ງໃຊ້ໃສ່ຊື່ວ່າ: "ແກ້ງຫຼວງ" ຈົນຮອດປະຈຸບັນນີ້.

ປີ 2024 ແຂວງເຊກອງ ຕັ້ງເປົ້ໝາຍສູ້ຊົນເຮັດໃຫ້ເສດຖະກິດຂະຍາຍຕົວເພີ່ມຂຶ້ນໃນລະດັບ 6% ມູນຄ່າ GDP ສະເລ່ຍໃສ່ປະຊາກອນໃຫ້ບັນລຸໄດ້ປະມານ 21,9 ລ້ານກີບຕໍ່ຄົນຕໍ່ປີ. ແຕ່ເຖິງຢ່າງໃດກໍຕາມ ເພື່ອບັນລຸຕົວເລກດັ່ງກ່າວ ທາງແຂວງມີຄວາມຕ້ອງການທຶນເພື່ອພັດທະນາທັງໝົດ 1.223 ຕື້ກີບ. ໃນນີ້, ການລົງທຶນຈາກງົບປະມານລັດ 73,38 ຕື້ກີບ ກວມເອົາ 6%, ທຶນຊ່ວຍເຫຼືອລ້າ ແລະ ກູ້ຢືມ 146,76 ຕື້ກີບ ກວມເອົາ 12%, ການລົງທຶນຂອງເອກະຊົນພາຍໃນ ແລະ ຕ່າງປະເທດ 1 ພັນຕື້ກວ່າກີບ ກວມເອົາ 82%.

ຕາມຂໍ້ມູນຈາກ ພະແນກແຜນການ ແລະ ການລົງທຶນແຂວງເຊກອງ ໃຫ້ຮູ້ວ່າ: ທິດທາງ, ແຜນວຽກຈຸດສຸມ ແລະ ຄາດໝາຍລວມໃນປີ 2024 ແມ່ນສຸມໃສ່ພັດທະນາ ແລະ ປັບປຸງໂຄງປະກອບເສດຖະກິດໃຫ້ມີຄວາມຫຼາກຫຼາຍຕາມຂະແໜງການຜະລິດ-ບໍລິການ, ມີຄຸນນະພາບ, ປະສິດທິພາບ ແລະ ມີມູນຄ່າເພີ່ມສູງຂຶ້ນຕາມທ່າແຮງບົ່ມຊ້ອນຂອງແຂວງ; ຍົກສູງ ແລະ ປັບປຸງກົນໄກການຄຸ້ມຄອງການລົງທຶນຂອງລັດ, ການລົງທຶນຂອງເອກະຊົນພາຍໃນ ແລະ ທຶນຊ່ວຍເຫຼືອເພື່ອການພັດທະນາໃຫ້ມີປະສິດທິພາບ, ປະສິດທິຜົນສູງກວ່າເກົ່າ; ສູ້ຊົນເກັບລາຍຮັບເຂົ້າງົບປະມານໃຫ້ໄດ້ຕາມແຜນ ຫຼື ລື່ນແຜນການທີ່ວາງໄວ້ ຕິດພັນກັບການປະຕິບັດມາດຕະການຕ້ານການຮົ່ວໄຫຼຂອງລາຍຮັບງົບປະມານ, ຍົກສູງຄຸນນະພາບການຄຸ້ມຄອງລາຍຈ່າຍ, ປະຕິບັດມາດຕະການປະຢັດຕ້ານການຟູມເຟືອຍ ແລະ ຮັກສາການຂາດດຸ່ນງົບປະມານໃຫ້ຢູ່ໃນລະດັບທີ່ເໝາະສົມ; ຊຸກຍູ້ສົ່ງເສີມ ແລະ ສ້າງຖານການຜະລິດກະສິກໍາເປັນສິນຄ້າ ທົດແທນການນໍາເຂົ້າ ແລະ ເປັນສິນຄ້າສົ່ງອອກ, ພັດທະນາສິນຄ້າໂອດ໋ອບໃຫ້ມີຜະລິດຕະພັນສິນຄ້າຫຼາກຫຼາຍ ແລະ ມີຄຸນນະພາບ ສາມາດແຂ່ງຂັນຕະຫຼາດພາຍໃນ ແລະ ພາຍນອກຢ່າງກວ້າງຂວາງ; ເອົາໃຈໃສ່ຄຸ້ມຄອງສິ່ງແວດລ້ອມ, ການຟື້ນຟູປ່າໄມ້ ແລະ ຮັກສາປ່າໄມ້ໃຫ້ຍືນຍົງ; ຫັນພະນັກງານຫຼັກແຫຼ່ງລົງກໍ່ສ້າງຮາກຖານການເມືອງ, ພັດທະນາຊົນນະບົດຮອບ ແລະ ລຶບລ້າງຄວາມທຸກຍາກ ຕາມທິດ 3 ສ້າງໃຫ້ ໂດຍເລັ່ງໃສ່ຜັນຂະຫຍາຍ ແລະ ປະຕິບັດໂຄງການຕ່າງໆທີ່ກໍານົດໄວ້ໃຫ້ເປັນຮູບປະທໍາ; ສືບຕໍ່ຜັນຂະຫຍາຍ ແລະ ປະຕິບັດວາລະແຫ່ງຊາດ ແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ແກ້ໄຂບັນຫາຢາເສບຕິດ ໃຫ້ສໍາເລັດຕາມຄາດໝາຍທີ່ວາງໄວ້.

ຕາມຂໍ້ມູນຍັງໃຫ້ຮູ້ຕື່ມວ່າ: ສໍາລັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ໃນ 4 ເດືອນຕົ້ນປີ 2024 ສາມາດເກັບລາຍຮັບເຂົ້າງົບປະມານໄດ້ທັງໝົດ 131,66 ຕື້ກີບ ທຽບໃສ່ແຜນປີເທົ່າກັບ 44,12%. ໃນນີ້, ລາຍຮັບພູດສູນກາງປະຕິບັດຢູ່ທ້ອງຖິ່ນ 25,57 ຕື້ກີບ ເທົ່າກັບ 33,18% ແລະ ລາຍຮັບພູດຂອງແຂວງ 106,09 ຕື້ກີບ ທຽບໃສ່ແຜນປີເທົ່າກັບ 47,93%; ການສົ່ງອອກສິນຄ້າປະຕິບັດໄດ້ 59,16 ລ້ານໂດລາ ທຽບໃສ່ແຜນປີເທົ່າກັບ 23,11% ແລະ ການນໍາເຂົ້າ 5 ແສນກວ່າໂດລາ ທຽບໃສ່ແຜນປີເທົ່າກັບ 2,78% ແລະ ສາມາດດຶງດູດການລົງທຶນເອກະຊົນໄດ້ 6 ໂຄງການ ມູນຄ່າ 6 ລ້ານກວ່າໂດລາສະຫະລັດ.

     ຕາດແຝກຕັ້ງຢູ່ບ້ານດ່ານ, ເມືອງລະມາມ ແຂວງເຊກອງ ຫ່າງຈາກເທດສະບານແຂວງ ໄປທາງທິດທາງທິດໃຕ້ 18 km ແລະ ຫ່າງຈາກເສັ້ນທາງເລກທີ 16B ໄປຫາຕາດ 2 km ແຕ່ກອ່ນ ບໍລິເວນເທິງຫົວຕາດ ແລະ ກ້ອງຕາດມີດອນ ແລະ ມີຫຍ້າແຝກປົກຫຸ້ມຢ່າງຫຼວງຫຼາຍ ອັນເປັນທີ່ມາຂອງຊື່ ຕາດແຝກ, ແຕ່ພໍຮອດປີ 1968 ເກີດມີ ນໍ້າຖ້ວມ ຄັ້ງໃຫຍ່ ຢູ່ເຂດນີ້ຈິ່ງເຮັດໃຫ້ຫຍ້າແຝກດັ່ງກ່າວ ດັບສູນຫາຍໄປ, ນໍ້າຕົກຕາດແຝກມີຄວາມສູງ 10 - 15 m ແລະ ກວ້າງ 250 m, ມີຄວາມສ່ວຍສົດງົດງາມ ແລະ ອຸດົມສົມບູນໄປດ້ວຍທໍາມະຊາດປ່າໄມ້ສີຂຽວ,ມີອາກາດປອດໂປ່ງແຈ່ມໃສ ແລະ ມີນ້ຳໄຫຼຜ່ານຕະຫຼອດ ລະດູການ,ເປີດບໍລິການທ່ອງທ່ຽວໃຫ້ນັກທ່ອງທ່ຽວທັງພາຍໃນແຕ່ຕ່າງປະເທດ ຕະຫຼອດປີ.

Tat Faek is located in Daan Village, Lamam District, Sekong Province, 18 km from the provincial municipality to the south and 2 km away from road No. 16B to Tat, but the area above Hua Tat and Cam Tat Midon is covered with a lot of grass which is the origin of the name of Tat Phaek, but until 1968 there was a big flood in this area, causing the grass to disappear, Tat Phaek waterfall is 15 meters high and 250 m wide, with a beautiful and abundant natural green forest, with clear air and flowing water throughout the season, open for tourism services for both domestic and foreign tourists throughout the year.

ທຳມະຊາດຈຸດຊົມວິວພູງົວ ທີ່ສວຍສົດງົດງາມຄຽງຄູ່ໄປກັບທຳມະຊາດ ອາກາດສົດຊື່ນ ທີ່ ເມືອງດາກຈຶງ ແຂວງເຊກອງ. ເມືອງດາກຈຶງ ເປັນອີກເມືອງຫນຶ່ງຂອງແຂວງເຊກອງ ທີມີສະຖານທ່ອງທ່ຽວ ຈຸດໂດດເດັ່ນມີຫລາກຫລາຍ ເຊີນບັນດາມາສຳພັດໄດ້