ວັນທີ 1 ສິງຫາ 2025 ອົງການກາແດງແຂວງເຊກອງ ໄດ້ເຄື່ອນໄຫວປຸກລະດົມ ຮັບບໍລິຈາກເລືອດ ເພື່ອຊ່ວຍເຫຼືອຊີວິດມະນຸດດ້ວຍກັນ ຢູ່ກອງບັນຊາການ ປກຊ ແຂວງ ໂດຍການນຳພາຂອງ ທ່ານ ນາງ ຂັນທະລີ ສິມທອງຄໍາ ຫົວໜ້າອົງການກາແດງແຂວງ ພ້ອມພະນັກງານວິຊາການ, ໂດຍມີທ່ານ ພັທ ວິຊຽນ ໄຊຍະສັກ ຮອງຫົວໜ້າພະແນກເສນາຮັກ ປກຊ ແຂວງ ພ້ອມບັນດາອ້າຍ-ນ້ອງທະຫານ ໃນກົມກອງ ເຂົ້າຮ່ວມ.

ທ່ານ ນາງ ຂັນທະລີ ສິມທອງຄໍາ ກ່າວວ່າ: ການສ້າງຂະບວນການຮັບບໍລິຈາກເລືອດ ໃນຄັ້ງນີ້ ເພື່ອເຊີນຊວນອ້າຍນ້ອງນາຍ ແລະພົນທະຫານ ປະກອບສ່ວນບໍລິຈາກເລືອດ ເພື່ອຊ່ວຍເຫຼືອຊີວິດມະນຸດດ້ວຍກັນ ແລະເພື່ອຂໍ່ານັບຮັບຕ້ອນກອງປະຊຸມໃຫຍ່ ຄັ້ງທີ XI ຂອງອົງຄະນະພັກແຂວງເຊກອງ ແລະປະຕິບັດຕາມແຈ້ງການຂອງເຈົ້າແຂວງເຊກອງ, ເລກທີ18/ຈຂ ແລະແຈ້ງການຂອງຫ້ອງວ່າການ ກະຊວງປ້ອງກັນປະເທດ ເລກທີ 1863/ຫວກ ວ່າດ້ວຍເຊີນຊວນປະກອບສ່ວນບໍລິຈາກເລືອດ ເພື່ອຊ່ວຍເຫຼືອຊີວິດມະນຸດດ້ວຍກັນ ປະຈໍາປີ 2025.

ທ່ານ ນາງ ຂັນທະລີ ສິມທອງຄໍາ ໃຫ້ຮູ້ຕື່ມວ່າ: ເລືອດເປັນສິ່ງສໍາຄັນທີ່ສຸດໃນການຮັກສາຊີວິດມະນຸດໃຫ້ຢູ່ລອດ, ນັກວິທະຍາສາດໄດ້ໃຊ້ເວລາຄົ້ນຄວ້າເປັນເວລາດົນນານ ແຕ່ບໍ່ທັນປະສົບຜົນສໍາເລັດໃນການຫາສານ ແລະສ່ວນປະກອບອື່ນໆ ເພື່ອມາທົດແທນເລືອດໄດ້, ສະນັ້ນ ເມື່ອຮ່າງການມີການສູນເສຍເລືອດຈາກພະຍາດຕ່າງໆ, ອຸປະຕິເຫດ, ເລືອດໄຫຼເວລາເກີດລູກ, ຜ່າຕັດ ແລະອື່ນໆ ທີ່ຕ້ອງຮັກສາດ້ວຍເລືອດ ຈຶ່ງຈໍາເປັນໃຫ້ມີການບໍລິຈາກເລືອດ ເພື່ອໄປຊ່ວຍຊີວິດມະນຸດພຽງຢ່າງດຽວ ໂດຍການລົງປຸກລະດົມຄັ້ງນີ້ ໄດ້ຮັບການບໍລິຈາກເລືອດ ຈໍານວນ 6 ຖົງ.